ХАХНХ-ын сайд С.Эрдэнэ Хөдөлмөрийн сайдын үүргийг давхар гүйцэтгэж буй. Тэрбээр ажил авсан өдрөө тушаал гаргаж, орон нутгийн Хөдөлмөрийн хэлтсийн дарга нарыг халж, сольсон хэмээн МАН-ын бүлэг Ерөнхий сайдад шаардлага хүргүүлсэн. Энэ асуудлаар С.Эрдэнэ сайдаас тайлбар авлаа.

-Үүрэг гүйцэтгэгч болонгуутаа тушаал гаргаж, төрийн албыг бужигнууллаа гэх мэдээлэл байна. Юу болсон талаар тайлбар өгөөч?

-Төрийн алба тасралтгүй байх зарчимтай. Тэр ч утгаараа намайг Хөдөлмөрийн сайдын үүрэг гүйцэтгэгчээр томилсон. Нэгдүгээрт, би Хөдөлмөрийн сайдын үүрэг гүйцэтгэгчээр томилогдсон учраас төрийн хуулийн дагуу эрх, үүргийг хэрэгжүүлэн ажиллаж байна. Хоёрдугаарт, би өнөөдөр нэг ч хүнийг халаагүй, нэг ч хүнийг томилоогүй. Харин хуульд нийцээгүй, үндэслэлгүй тушаалуудыг хүчингүй болгосон.

-Өмнөх сайдын тушаал хууль бус гэдгийг яаж батлах вэ?

-16 аймаг, дүүргийн Хөдөлмөрийн хэлтсийн дарга шүүхэд хандсан. Тэд бүгд үндэслэлгүй ажлаас халагдсан гэсэн гомдол гаргаж, найман сар шүүхээр явж байна. Өмнөх сайд үүрэг гүйцэтгэгчдийг чөлөөлөөд, үүрэг гүйцэтгэгчдийг томилсон. Сонгон шалгаруулалтыг нээлттэй бус хаалттай явуулсан зэргээр маш олон зөрчил бий. Би өөрөө үндэслэлүүдийг нь судалж, шалгасан. Хөдөлмөрийн яам хөдөлмөрийн хуулийг зөрчиж болохгүй. Гурван газрыг нийлүүлж, Хөдөлмөрийн үйлдвэр, сургалтын төв гэж байгуулан түүнийгээ бүтцийн өөрчлөлт гэж нэрлээд, дарга нарыг нь ажлаас халчихсан байгаа. Гэтэл хөдөлмөрийн хуулинд тухайн байгууллага татан буугдсанаас өөр нөхцөлд ажил олгогчийн санаачилгаар ажлаас халахыг хориглоно гэж заасан байдаг. Энэ мэт хууль бус тушаалыг л хүчингүй болгосон. Гомдолтой байвал тухайн хүмүүс шүүхэд хандах бүрэн эрхтэй.

В.Бат