Баянзүрх дүүргийн хүүхдүүд цэцэрлэгт хамрагдахын тулд сугалаа сугалж, азаа сорих шаардлагатай болжээ. Азтай нь цэцэрлэгт хамрагдаж, азгүй нь гэртээ үлдэхээр болчихоод байгаа. Энэ зохицуулалтыг эсэргүүцсэн эцэг, эхчүүд Баянзүрх дүүргийн Засаг даргын Тамгын газарт цуглаан хийж байна. Эцэг эхчүүд хүүхдээ цэцэрлэгт бүртгүүлэхийн тулд өнгөрсөн сарын сүүлээс эхлэн өдөр, шөнөгүй дугаарласан ч дүүргийн Боловсролын хэлтсээс  элсэх хүүхдүүдийг сугалаагаар тодруулах шийдвэр гаргасан нь тэднийг бухимдуулжээ. Тиймээс эцэг эхчүүд энэ шийдвэрээ цуцлахыг шаардаж байна.

Тус дүүргийн Боловсролын хэлтсийн дарга  Х.Батбаяр  “цэцэрлэгийн хүрэлцээ хангалттай байсан бол ийм асуудал үүсэхгүй. Тиймээс бид байгаа цэцэрлэгтээ иргэдийнхээ хүүхдийг тэгш хуваарилахаар зорилгоор энэ аргыг сонгосон” гэдгийг эцэг эхчүүдэд тайлбарласан ч тэд хүлээж авсангүй. Мөн Х.Батбаяр дарга эцэг эхчүүдийн төлөөлөл болон цэцэрлэгийн удирдлагуудтай хамтарсан уулзалт хийж, өнөөдөр 15.00 цагт цэцэрлэгийн бүртгэл явуулах аргыг эцэслэн тогтоохоор болов.

Эцэг эхчүүдийн төлөөлөл болох Ч.Оюундарь “Да хүрээ зах дээр шинээр гэр цэцэрлэг нээгдэж байгаа. Гэхдээ зөвхөн ажилчдын 4-5 настай хүүхдийг авна гэж байгаа юм. Тэгэхээр цаана нь дугаарлаж байгаа хүмүүсийн хүүхдийг яах вэ. Түрүү жил насны ангилал заасаар байгаа хоёр хүүхдийг маань аваагүй. Энэ бол мөн л хүүхдээ цэцэрлэгт оруулж чадахгүй болчихоод байна. 2 настай 50 хүүхэд авна, 3, 4 настай хүүхдийг огт авахгүй гэсэн. Тэд хаачих юм бэ. Сугалаа гэдэг бол огт худлаа. Бид олон хоног нойр хоолгүй дугаарлаж байна” хэмээн бухимдаж байна.

В.Бат