Чөлөөлөх дайны ялалтын 70 жилийн ойд зориулсан цэргийн ёслолын жагсаал БНХАУ-ын Бээжин хотын төв талбайд боллоо. Энэхүү жагсаалд Монгол Улсын цэрэг дайчид эх орноо төлөөлөн алхлаа.

Зэвсэгт хүчний 31 анги салбараас цугласан 63 алба хаагч, хилийн цэргийн 11 анги салбарын 13 алба хаагч нийт 76 цэрэг эрс Монгол Улсын гэх нэг нэр, нэг уриан дор нэгдэж цэргийн ёслолын жагсаалд оролцсон билээ.

Тэд эгэл жирийн байлдагчаас дэд хурандаа хүртэлх цолтой Монгол цэргүүд. Жагсаалыг ЗХЖШ-ын ахлах мэргэжилтэн, дэд хурандаа Б.Хаш-Эрдэнэ командлаж, Монгол цэргүүд өмнөх түүхэнд монгол цэргийн байгуулсан алдар гавьяаг дуурсгаж, өдгөө тэдний нэр төрийг өргөж БНХАУ-ын Бээжин хотын төв талбайд алхлаа.

Монгол цэргүүд ОХУ-ын Москва хотын Улаанталбайд Ялалтын баярын ёслолын жагсаалд оролцохдоо 284 метр зайд хөл тавьж алхсан. Харин БНХАУ-ын Бээжин хотын Тянь-Аньмэний талбайд Чөлөөлөх дайны 70 жилийн ойн цэргийн ёслолын жагсаалд оролцож буй олон улсын цэргүүд 820 шахам метр алхсан юм.

Б.Хүлэг