Туркийн Бодрум хотын ойролцоо далайн эрэг дээр доош харан хэвтэж буй хүүгийн цогцсыг эргийн хамгаалагчид олсон. Харамсалтайгаар амиа алдсан хүүгийн зургийг  “Доган” мэдээллийн агентлагийн зурагчин авч, өөрийн твиттертээ байршуулсан юм.  Амиа алдсан хүү Сири улсын иргэн бөгөөд тэрээр гэр бүлийнхээ хамтаар Грек очихоор явж байжээ.

Хүүгийн нэрийг Алан Курди гэдэг. Тэрээр дөнгөж хоёрхон настай байсан бөгөөд ээж, таван настай ахынхаа хамтаар амиа алджээ. Тэд завиар Сирийн Кобоне хотоос Грект цагаачлахаар төлөвлөж байсан юм. Харамсалтай нь завь Туркийн ойролцоо живсэн бөгөөд хүүгээс гадна 11 хүн амиа алджээ.

Олон улсад маргаан дэгдээгээд буй дүрвэгсдийн асуудлаар дэлхийн удирдагчдыг тайлбар хийхийг олон нийт шаардаж байна. Дүрвэгсдэд боломж олгохыг Франц, Унгар, Грекийн иргэд шаардаж, парламентын ордны гадна эсэргүүцлийн жагсаал зохион байгуулах болжээ. Жагсагчид Алан Курдигээс гадна олон сая хүүхдүүд шударга бус зүйлийн золиос болж буйн буруутгаж, “Европын удирдлагууд хүүг алчихлаа”, “Тэдэнд орогнох эрх олго” гэх мэт лоозон барьцгаажээ. Энэхүү жагсаалд ойролцоогоор таван сая хүн нэгдсэн тухай НҮБ-ын Дүрвэгсэд хариуцсан төвөөс мэдээллээ.

Дүү минь диваажин руу явчихлаа

“Хорвоод ирээд хоёрхон жилийн дараа Алан Курди буцаад диваажин руугаа явчихлаа” хэмээн хүүгийн авга эгч Тима Курди сэтгүүлчдэд ярьжээ.

Тэрбээр Туркт амьдардаг юм. Хүүгийн зураг болон түүний мэдээлэл ил болсны дараа Тима сэтгүүлчдэд хандан, олон улсын дүрвэгсэд, тэр тусмаа хүүхдийн асуудалд анхаарлаа хандуулахыг шаарджээ. Тима “Миний зүрх уйтгар гунигаар дүүрч байна. Эрэг дээр хэвтэж буй хүүгийн зургийг хараад “Бурхан минь Алан л биш байгаасай хэмээн залбирсан” гэж хэлжээ. Тэрбээр  "Дүү минь амиа алдахдаа миний бэлэглэсэн гутлыг өмсчихсөн байсан.  Би тэр гутлыг өнгөрсөн арваннэгдүгээр сард бэлэглэсэн” гэжээ.

Би үхмээр байна

Амиа алдсан хүү ээж Рихан болон төрсөн ах Галипийн хамтаар хорвоогоос явжээ. Нэг өдөр гэр бүлээ алдсан хөвгүүдийн аав Абдулла Курди гэр бүлийнхээ хамтаар Канад руу цагаачлахаар төлөвлөж байсан ч тус улсын удирдлагууд удаа дараа татгалзсан аж. Түүний эгч Канадад амьдардаг байжээ.

Курдигийн гэр бүлийн зорчиж явсан завь хөмрөх үед тэрбээр эхнэр, хүүхдүүдээ аврахыг оролдсон ч бүтэлгүйтсэн байна. Курди “Би үхмээр байна. Би хайртай эхнэр, өхөөрдөм хөөрхөн үрсээ алдлаа. Надад амьд явах утга алга. Өглөө бүр хөвгүүд минь Ааваа хайртай шүү. Бид хэзээ байшинтай болох вэ?, Бид хэзээ сайхан амьдрах вэ?” гэж асуудаг байсан. Би гэр бүлийнхээ мөрөөдлийг биелүүлэхийн тулд бүхий л хүчээ дайчилсан ч ийнхүү хөвгүүддээ аз жаргалыг мэдрүүлж чадалгүй хорвоогоос явуулчихлаа” гэж хэлжээ.

“Эрэг мөргөсөн хүн төрөлхтөн” гэх зураг интернэт ертөнцөд шуугиан тарьж, Курдигийн гэр бүл амиа алдсан болохыг тогтоосны дараа удаан хугацааны турш орогнол олгохоос татгалзсан Канадын Засгийн газар түүнд орогнол олгохыг зөвшөөрчээ. Курди энэхүү саналаас татгалзаж, “Би амьдралгүй болсон. Надад цаашид амьдрах итгэл алга. Би хөвгүүдийн булшны дэргэдээс явж чадахгүй” гэж хэлжээ. Энэхүү мэдээллийн дараа иргэд Канадыг удирдлагуудыг “хүн чанаргүй” хэмээн буруутгаж, хүчтэй шүүмжилсэн байна.

Б.Дэлгэрцэцэг