Өнгөрсөн долоо хоногт Сири, Палестин улсаас дүрвэсэн 150 хүн Газар дундын тэнгист буюу Ливийн ойролцоо осолдож, амиа алджээ. Тэд Европыг чиглэн завиар явж байхдаа осолдсон байна.

Мөн өнгөрсөн долоо хоногт Австрийн хурдны замд хөдөлгөөнд оролцож байсан ачааны машинаас 71 хүний цогцос олдсон. Тэднийг дүрвэгсэд хэмээн албаныхан мэдээлсэн билээ. Амиа алдсан хүмүүсийн 58 нь эрэгтэй, найман эмэгтэй, дөрвөн хүүхэд байжээ. Халед Баракен гэгч фэйсбүүктээ амиа алдсан дүрвэгсдийн зургийг байршуулсан ч фэйсбүүк дээрх зургуудыг устгасан байна. Эдгээр зургуудыг 24 цагийн дотор 90 мянган хүн үзжээ.

Өнгөрсөн гурван жилийн хугацаанд АНУ-д шилжин ирэгсдийн ихэнх нь иргэний дайн дэгдээд буй Сири, Судан, Ливи болон Палестин улсаас ирсэн байна.2014-2015 оны хооронд Ойрхи, Дорнодын нөхцөл байдал хүндэрсний улмаас Европ, Америкийг зорин ирэх цагаачдын тоо 40 хувиар өсчээ.

НҮБ-ын мэдээлснээр “300 мянган дүрвэгсэд Газар дундын тэнгисийг гаталсан бөгөөд ойролцоогоор 2500 хүн амиа алдаж, сураггүй алга болсон” гэжээ. Дэлхийн II дайны үед бөөнөөр хорих лагерьт хоригдож байсан хүмүүсийг чөлөөлсний дараа хагас сая хүн Европыг зорин иржээ.

Б.Дэлгэрцэцэг