Н.Даваахүү, Б.Мөнгөнтуяа нарт 19 сая 200 мянган төгрөгийн торгуулийн ял оноолоо

Ерөнхий сайд асан Н.Алтанхуягийн ахлах зөвлөх, Шинэчлэлийн Засгийн газраас хэрэгжүүлсэн “Нүүрс” хөтөлбөрийг ахалж ажилласан  Л.Гансүх, “Эм Жи Эл Эс Би” компанийн захирал Н.Даваахүү, тус компанийн нягтлан бодогч Б.Мөнгөнтуяа нарт холбогдох эрүүгийн хэргийг шүүх хурал Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхэд таван өдөр үргэлжилж, шүүхийн шийдвэр гарлаа.

Тэднийг Нүүрс хөтөлбөрийг хэрэгжүүлэхдээ 3.6 тэрбум төгрөгийг завшсан хэрэгт буруутган шүүсэн юм. Шүүхээс тэднийг гэм буруутай гэж дүгнэлээ.

Шүүхээс Л.Гансүхийг бусадтай бүлэглэн урьдчилан үгсэн тохиролцож алба тушаалын байдлаа урвуулан ашиглаж, гэмт үйлдлийг гардан зохион байгуулсан хэрэгт буруутган 4.6 жилийн хорих албан тушаал эрхлэх эрхийг 4 жилийн хугацаагаар хасах ял оноолоо.

Харин Эм Жи Эл Эс Би компанийн захирал Н.Даваахүү, тус компанийн нягтлан бодогч Б.Мөнгөнтуяа нарыг бусадтай бүлэглэн үгсэн тохиролцож, албан тушаалын байдлаа урвуулан ашиглаж онц их хэмжээний хохирол учруулсан хэрэгт буруутай гэж үзэн хөдөлмөрийн хөлсний доод хэмжээг 100 дахин нэмэгдүүлсэнтэй тэнцэх буюу 19 сая 200 мянган төгрөгөөр торгох, албан тушаал эрхлэх хугацааг хоёр жилээр хасах шийдвэрийг шүүхээс гаргалаа.  

Ингэхдээ Б.Мөнгөнтуяагийн цагдан хоригдсон 203 хоногийн хугацааг мөнгөн хэлбэрт шилжүүлж, торгох ялыг эдэлсэнд тооцсон. Харин Н.Даваахүүгийн цагдан хоригдсон 46 хоногийн хугацааг ялаас хасч, үлдсэн 10 сая 52 мянган төгрөгийг төлүүлэхээр шийдвэрлэв. Түүнийг торгох ялаас зайлсхийсэн тохиолдолд хорих ялаар солихыг сануулсан.

Л.Гансүх, Н.Даваахүү, Б.Мөнгөнтуяа нараас хоёр тэрбум таван зуун гучин есөн сая долоон зуун гучин есөн мянга найман зуун жаран төгрөгийг хувь тэнцүүлэн гаргуулж Багануур ТӨХК-д олгуулахаар шийдвэрлэсэн. Мөн Л.Гансүхийг өнөөдрөөс эхлэн жирийн дэглэмтэй эрэгтэйчүүдийн хорих ангид ял эдлүүлж, түүний цагдан хоригдсон хоногийг ялаас хасахаар боллоо.

Анхан шатны шүүхийн шийдвэрийг эс зөвшөөрөх аваас 14 хоногийн дотор Эрүүгийн хэргийн давж залдах шатны шүүхэд гомдол гаргах эрхтэй.

Шүүх хуралдааны үеэр шүүгдэгчдийн өмгөөлөгчид шүүх бүрэлдэхүүн, шүүх хуралдааныг даргалагч шүүгч болон улсын яллагчаас татгалзсан хүсэлт гаргасан боловч шүүх татгалзлыг үндэслэлгүй гэж үзэн, хүлээж авалгүйгээр шүүх хуралдааныг үргэлжлүүлсэн юм. Шүүх хуралдааныг олон нийтийн мэдээллийн хэрэгслээр шууд дамжуулан хүргэлээ.

Б.Хүлэг