Хуульзүйн байнгын хорооны хуралдаанаар Өршөөлийн тухай хуульд нэмэлт өөрчлөлт оруулах төслийг хэлэлцэх явцад гишүүдийн хооронд ширүүхэн маргаан өрнөв. Тэр дундаа УИХ-ын гишүүн З.Баянсэлэнгэ тун бухимдалтай цамнаж байлаа.  Тэрбээр  АТГ, Хуульзүйн байнгын хорооны дарга, эрх баригчдад хандан ширүүхэн үгээр шүршсэн юм.УИХ-ын гишүүн З.Баянсэлэнгэ хэлэлцэж байгаа асуудалтай холбогдуулан:

-АТГ сэжигтнээр тооцоогүй юм бол яагаад УИХ-ын гишүүн дээр хэрэг үүсгээд байна вэ? Сэжигтнээр тооцохгүй бол хэргийг хаах хэрэгтэй. АТГ яагаад Өршөөлийн хуультай холбогдуулж мэдэгдэл хийсэн бэ? Энэ мэдэгдэл чинь өөрөө УИХ, Засгийн газрын гишүүд хэрэгт холбогдсон хэргээсээ гарах гэж  байна гэсэнтэй агуулга адил мэдээлэл түгсэн. Өнөөдрийн Өршөөлийн хууль явахгүй байгаагийн  нэг гацаа нь АТГ-аас болсон. Өнөөдөр хоригийг хуульд яаж шийдэх вэ? Ажлын хэсэг хуралдсан. Хуралдаад санал авсан. Одоо байнгын хороо л санал хураах үлдсэн. Та нар яагаад гаргасан шийдвэрээсээ буцаж, заваараад байдаг юм бэ? Тэр дундаа АН дандаа хүний гараар могой барина.  Өршөөлийн хуулийг гаргана гэж байгаад баталсан. Хамгаалж чадахгүй юм бол үхсэндээ ингэж наашаа цаашаа гүйлдээд байгаа юм. Юугаа хийж байнгын хорооны даргын суудал бөглөөд суугаад байгаа юм бэ? Ийм балиар юм хийхээ болиоч. Одоо хэний захиалгаар юу болгоод явуулж байгааг чинь дараа нь илчилнэ, хэлнэ. “Өршөөлийн хуулийг битгий хүлээж аваарай, Ерөнхийлөгч утасдаад байна”  гэсэн гээд гүйлдээд явж байдаг. Та нар өөрсдөө УИХ-ыг чадамжгүй болгож байгаа шүү.  Та нарын энэ заваан зүйлээс болоод нэг ч аавын хүү шоронгоос гарч чадахгүй байгаа шүү. Өөрсдөө санаачилчихаад биднийг гаргасан гэж гүтгээд. Р.Гончигдорж гишүүний гаргасан саналыг Д.Оюунбаатар гишүүн рүү дайруулж гүйцгээдгээ боль хэмээн уурссан юм.

Харин Хуульзүйн байнгын хорооны дарга Д.Ганбат “Бүх зүйл хуулийн дагуу яваа”  гэхээс өөр хариу няцаалт хэлсэнгүй.

Н.Энх