Ойрхи Дорнодод хяналтаа тогтоохыг санаархаж буй “Халифын вант улс” бүлэглэлийн эсрэг ОХУ нэгдэж, агаараас цохилт өгч эхэлсэн тухай тус улсын Батлан хамгаалахын сайд Сергей Шойгу мэдэгдлээ. Тэрбээр “Орос хэт даврагчдад цохилт өгч, олон сая хүнийг аврахаар төлөвлөж байна. Орос ялалт байгуулах хүртэл цохилтоо үргэлжлүүлэх болно” гэж хэлжээ.

“TASS” агентлагийн мэдээлснээр “Оросын тусгай хүчин хэт даврагчдад цохилт өгч буй 2-3 минутын видео бичлэгүүд “youtube.com” дээр байршиж эхэлсэн” гэсэн байна. АНУ-ын Засгийн газар Оросын цохилт өгч буй газруудад хэт даврагчид хяналтаа тогтоогоогүй харин Сирийн сөрөг хүчний хяналтад байдаг бүс нутгуудад агаараас цохилт өгч байна гэж буруутгажээ.

Оросын сөнөөгч онгоцууд өчигдөр Сирийн Кафр Залида мужид агаараас цохилт өгчээ. Цагаан ордноос мэдээлснээр энэхүү мужид хэт даврагчид бус сөрөг хүчин байршдаг гэв.

АНУ-ын Төрийн нарийн бичгийн дарга Жон Керри “Орос хэт даврагчидтай бус Сирийн Ерөнхийлөгч Башар аль Ассадын гол өрсөлдөгч сөрөг хүчинд цохилт өгч байна. Тагнуулын мэдээллээр Оросын агаараас цохилт өгч буй бүс нутгуудад хэт даврагчид байхгүй” гэсэн бол ОХУ-ын Гадаад хэргийн сайд Сергей Лавров “Бид сайтар судалгаанд үндэслэн агаараас цохилт өгч байгаа” гэж хариу мэдэгдсэн байна.

Пентагоны тэргүүн Эштон Картер хүртэл Засгийн газартайгаа адилхан бодолтой байгаа бөгөөд тэрбээр “Орос хэт даврагчдад цохилт өгөхгүй байна” гэж хэлжээ. Батлан хамгаалахын төлөөлөгчдийг Москва руу илгээсэн болохоо Картер өчигдөр сэтгүүлчидтэй уулзах үеэрээ мэдэгджээ.

Б.Дэлгэрцэцэг