Б.Чойжилсүрэн, Ч.Хүрэлбаатар нарыг УИХ-ын гишүүнээс эргүүлэн татах уу?

УИХ-ын сонгуулийн 15 дугаар тойрог буюу Увс аймгаас УИХ-д сонгогдсон хоёр гишүүний мандатыг хүчингүй болгож мэдэх нь. Үндсэн хуулийн цэцийн маргаашийн хуралдаанаар СЕХ-ны 2012 оны "Сонгуулийн дүн айлтгах тухай" тогтоолын Увс аймгийн хэсэг Үндсэн хууль зөрчсөн эсэх асуудлыг хэлэлцэхээр болжээ. Тодрулбал, Увс аймгаас сонгогдсон УИХ-ын нэр бүхий хоёр гишүүнийг сонгогдсонд тооцсон СЕХ-ны тогтоол Үндсэн хуульд нийцэж буй эсэхийг хэлэлцэх юм.
МАН-аас нэр дэвшсэн Б.Чойжилсүрэн, Ч.Хүрэлбаатар нарыг Сонгуулийн хуулийг удаа дараа зөрчсөн гэдгийг гурван шатны шүүхээр тогтоосон тухай хоёр жилийн өмнө АН-ын ерөнхий нарийн бичгийн дарга Ц.Оюундарь болон Увс аймагт АН-аас нэр дэвшсэн Д.Нямхүү, Т.Мэндсайхан нар мэдээлж байв.
Б.Чойжилсүрэн, Ч.Хүрэлбаатар нар 2012 оны сонгуулиар иргэдийн гэрийг түрээслэн мөнгө тарааж, увсчуудын олонхийн саналыг авсан гэж байв. Сонгуулийн дараа Б.Чойжилсүрэн, Ч.Хүрэлбаатар нарын туслахаар ажиллаж байсан долоон хүн мөнгө тараасан нь тогтоогдон ял авсан юм. Тэгвэл энэ дуулиан дахин гарч ирсэн нь Цэцийн маргаашийн хуралдаан боллоо. УИХ-ын гишүүн Б.Чойжилсүрэн, Ч.Хүрэлбаатар нар парламентын танхимд үлдэх үү, тэднийг эргүүлэн татах уу гэдгийг маргааш шийдэх нь.
М.Цэцэг
Эх сурвалж: www.polit.mn
СЭТГЭГДЭЛ БИЧИХ