УИХ дахь МАН-ын бүлгийн Өршөөлийн хуулиар авсан тав хоногийн завсарлага өнөөдөр дууссан. Тиймээс энэ хуулийг чуулганы нэгдсэн хуралдаанаар хэлэлцэх ёстой байсан ч МАН-ын бүлгийн завсарлагыг дахин гурав хоногоор сунгалаа. 

 МАН-ын бүлгийн дарга С.Бямбацогт "Хуульзүйн байнгын хорооны даргын сонгуулийн асуудлаас болж өнгөрсөн өдрүүдэд Өршөөлийн тухай хуулийн процедурын дутуу асуудлыг шийдэж чадсангүй. Улсын Их Хурлын дарга өдөр бүр байнгын хороо хуралдаж асуудлаа дуусгаж оруулж ир гэсэн шаардлагыг тавьж байсан. МАН-ын бүлгийн гишүүд ч Өршөөлийн тухай хуулийг хурдан батлах ёстой, ингэхдээ хуулийн процедурын алдаагаа засаад чуулганы нэгдсэн хуралдаанд оруулах ёстой гэсэн байр суурьтай байгаа. Иймээс Хууль зүйн байнгын хороог хуралдуулах мөн МАН-ын бүлгээс авсан завсарлагын хугацааг сунгаж өгөхийг хүсч байна" гэсэн тайлбарыг өгөв. 

Энэ дагуу УИХ-ын дарга Өршөөлийн тухай хуулиар МАН-ын бүлгээс авсан завсарлагын хугацааг сунгаж, ирэх долоо хоногт 3 хоногийн нэмэлт завсарлага өглөө.