Оросын Сочи хотноо өчигдөр “Grand Prix” уралдаан болж өндөрлөжээ. Тус уралдаанд “Формула 1”-ийн од Льюс Хэмилтон түрүүлсэн тухай “www.dailymail.co.uk” мэдээллээ. Шагнал гардуулахаар Ерөнхийлөгч В.Путин хүрэлцэн ирсэн бөгөөд тэрбээр цом болон мөнгөн шагналаа Хэмилтонд өгчээ. Тамирчин эр шагналаа гардан авсны дараа гартаа барьсан оргилуун дарсаа сэгсэрч Путин руу цацсан байна.

Оросын интернэт хэрэглэгчид Хэмилтонг буруутгаж, Путинээс уучлалт гуйхыг шаардсан байна. Тэрбээр твиттертээ “Миний сэтгэл их хөдөлсөн байсан. Би Путинтэй анх удаагаа уулзаж байна. Тиймээс уулзалтаа мартагдашгүй болгохыг хүссэн” гэж жиргэжээ.

Хэмилтон өмнө нь Бээжингийн уралдаанд ялалт байгуулсаныхаа дараа хажуудаа зогсож байсан хятад бүсгүй рүү оргилуун дарс цацаж, хятадуудын дургүйцлийг хүргэж байсан юм.

Хятадууд тамирчин эрийг уучлалт гуйхыг шаардаж, хөдөлгөөн хүртэл өрнүүлсэн билээ. Энэ бүхнээс шалтгаалан Хэмилтон ёсгүй үйлдэл гаргасандаа уучлалт гуйж, дахин алдаа гаргахгүй гэдгээ мэдэгдсэн удаатай.

Б.Дэлгэрцэцэг