Сэлэнгэ аймгийн Мандал суманд гэмт хэргийн тоо 20 орчим хувиар нэмэгдсэн байна. Архидан согтуурах, танхайрах зэрэг зөрчил ихээр нэмэгдэж, эрүүгийн нөхцөл байдал хүндэрлээ. Эрүүгийн гэмт хэрэгт холбогдож, удаа дараа ял шийтгэгдсэн нэр бүхий хэд хэдэн хүн тэнд очиж нүх амуудыг хуваарилах нэрийдлээр бусдыг айлган сүрдүүлж дарамталсан хэрэг гарч байна. Энэ бол Цагдаагийн ерөнхий газрын дэд дарга Ж.Буянбатын Ерөнхий сайдад өгсөн танилцуулга.

Нинжа нар Ноён уулыг эзэлж, газрыг нутгийг ч сэндийчиж, нутгийн иргэдийг ч амар тайван байлгахаа болилоо. “Аав”-ынд байсан нөхөд эрхээ тогтоож, гэмт хэргийн нөхцөл байдал хүндэрлээ гэж  хэвлэлээр бичиж байсан зүйлийг албаны хүн ийн баталгаажууллаа. Товчхондоо Ноён уул дараагийн Заамар болсон гэсэн үг.

Хэдэн арваар тоологддог байсан нинжа нар өдгөө хэдэн зуу болж,  Ноён уулыг сэндийчиж эхэлжээ. Энэ сарын 20-нд л гэхэд 110 машинтай 400-500 гар аргаар алт олборлогчид газар ухаж байсныг Сэлэнгэ аймгийн цагдаагийн хэлтсийн 13 цагдаа болон “Бүрэнцэнгэл”  хамгаалалтын албаныхан тараасан байна.  Хамгаалалтын алба, цагдаагийн байгууллага байнгын ажиллагаатай  байгаа ч нинжа нар тэдний хараа хяналтаас аль хэдийнэ гарчээ. Албадан тарааж, хэсэг нинжаг гаргадаг ч шөнө оройн цагаар хэдэн зуу болон ирж, газрыг ухаж эхэлдэг байна.

“Хорин сайхан шарыг минь хоёрхон хулгана идчихлээ” гэж халаглаж суудаг киноны хэсгийг санагдуулам үйл явдал Гацууртад өрнөж байна.  Хууль дүрмийн дагуу үйл ажиллагаа явуулж, байгаль орчныг нөхөн сэргээж, улсад ч татвар хураамжаа төлөх компаниас харамласны гор өдгөө гарч байна. Нинжа нараас татвар авч, ухсан нүхийг нь булуулах боломж бий билүү.

Гацууртын орд дараагийн Заамар болж, Ноён уулнаас ухсан нүх, овоолсон шороо л үлдэх бололтой.

В.Бат