УИХ-ын Төрийн байгуулалтын байнгын хорооны хуралдаанаар  2016 оны төсвийн төслийг дагалдан өргөн мэдүүлсэн хууль, тогтоолын төслүүдийг хэлэлцэж байна.

Хуралдааны эхэнд Засгийн газраас хуулийн төсөл эгүүлэн татах бичиг ирүүлснийг Төрийн байгуулалтын байнгын хорооны дарга А.Бакей танилцуулав.

Засгийн газраас төрийн байгуулагын бүтэц, зохион байгуулалтыг боловсронгуй болгож, чиг үүргийн давхардлыг арилгах, төрийн албаны зардлыг бууруулах зорилгоор 2015 оны тодотгол болон 2016 төсвийн төсөлтэй хамт Засгийн газрын тухай хуульд өөрчлөлт оруулах тухай, Засгийн газрын бүтцийн тухай, Засгийн газрын бүрэлдэхүүний тухай, Засгийн газрын бүтцийн тухай хуулийг хүчингүй болсонд тооцох тухай хуулийн төсөл,  “Төрийн захиргааны байгууллагын тогтолцоо, бүтцийн ерөнхий бүдүүвчийг шинэчлэн батлах тухай” УИХ-ын тогтоолын төслийг өргөн мэдүүлсэн.

Дээрх хуулийн төслүүдэд Засгийн газрыг 2016 оны 8 дугаар сарын 01-нээс эхлэн 9 яамтай ажиллахаар тусгасан. УИХ-ын гишүүд уг заалт нь 2016 оны сонгуулийн дараа байгуулагдах Засгийн газрын бүрэн эрхэд халдсан асуудал тул 2016 оны нэгдүгээр сарын 01-нээс хэрэгжүүлж эхлэх нь зөв гэсэн санал гаргасан. Энэ нь  өнөөгийн Засгийн газрын тогтвортой байдалд сөргөөр нөлөөлөх магадлалтай болсныг Ерөнхий сайд хуулийн төсөл татан авах бичигтээ дурьджээ.

Тэрбээр, Экспортын голлох бүтээгдэхүүнүүдийн үнийн уналтаас хамааралтай эдийн засгийн хүндрэлтэй байгаа өнөөгийн нөхцөлд Засгийн газрын тогтворгүй байдалд орох нь муу үр дагавар үзүүлнэ. Тиймээс дээрх хуулийн төслүүдийг эгүүлэн татаж байна” гэжээ.

Түүнчлэн Засгийн газар төрийн байгуулагын бүтэц, зохион байгуулалтыг боловсронгуй болгож, чиг үүргийн давхардлыг арилгах, төрийн албаны зардлыг бууруулах зорилгоосоо ухрахгүй бөгөөд уг асуудлыг Үндсэн хуулийн нэмэлт өөрчлөлтийн хүрээнд ажиллах болно гэдгийг Ерөнхий сайд бичигтээ онцолжээ.

Н.Энх