УИХ-ын гишүүн Г.Уянга Ерөнхий сайдыг огцруулах асуудлыг өргөн мэдүүлэхээр гарын үсэг цуглуулж байгаа билээ. Оюутолгойн далд уурхайн бүтээн байгуулалтыг эхлүүлэх гэрээг Дубайд очиж үзэглэсэн учраас түүнийг огцруулахаар гарын үсэг цуглуулж эхэлсэн юм.

Тэгвэл энэхүү огцруулах бичигт “Шударга ёс” эвслийн гишүүд гарын үсэг зурахаар болсон гэх мэдээлэл цацагдаж эхэллээ. “Шударга ёс” эвслийн бүлэг Өршөөл үзүүлэх тухай хуульд АН-ынхан хэлсэн ярьснаасаа ухарсан хэмээн бухимдаж буй.

Тиймээс Засгийн газраас гарах эс бөгөөс Ерөнхий сайдын танхимыг огцруулахаар санал нэгдсэн гэх бор шувуу нисч байна. Эвслийн бүлгийн албан эх сурвалжаас энэ талаар тодруулахад одоогоор намаас тийм чиглэл өгөөгүй. Хэрвээ гишүүд итгэл үнэмшлээрээ гарын үсэг зурах бол тэднийг хорих аргагүй гэсэн тайлбар өглөө.

Өршөөл үзүүлэх тухай хуулиар МАХН-ын дарга Н.Энхбаярт гэхээс илүүтэй мөрдөн шалгаж буй Н.Энхбаярын дүү Н.Энхтуяа, туслах Б.Хуяг нар өршөөлд хамрагдах байсан юм. Өршөөл үзүүлэх тухай хуульд цөөнх болсон эвслийн бүлгийн шийдвэрийн дараа намын дарга Н.Энхбаяр тун ч ууртай байсан сурагтай. Засгийн газраас гарна гэх бор шувууг МАХН-ын зүгээс өнгөрсөн хоёр сарын хугацаанд явуулсан бөгөөд Засгийн газрыг огцруулах уу, эсвэл өөрсдөө гарах уу гэдэг нь цаг хугацааны л асуудал юм байна.

Б.Тогтох

Эх сурвалж: www.mminfo.mn