“Сэтгэшгүй” эмнэлгийн ерөнхий эмч С.Хүрэлбаатар хэвлэлд хандлаа. Тэрбээр өнгөрсөн дөрөвдүгээр сарын 7-нд тус эмнэлэгт нас барсан иргэн Д-ийн биед шинжилгээ хийсэн шүүх эмнэлгийн дүгнэлтийг танилцуулж, мэдэгдэл хийв.

Уг эмнэлэгт өнгөрсөн гуравдугаар сард бэлхүүснээс доош гэнэт мэдээгүй болсон оноштой Төв аймгийн Эрдэнэсант сумын иргэн 61 настай Д гэгч эмчлүүлэхээр иржээ. Харин өвчтөн  дөрөвдүгээр сарын 7-ны өдөр нас барсан бөгөөд шалтгааныг тус эмнэлгийн эмчийн буруутай үйлдлээс болсон хэмээн мэдэгджээ.

Талийгаач Д нь “Сэтгэшгүй” эмнэлэгт нугасны мэдрэлийн ёзоорын эмгэгшил, доод мөчдийн саажил гэсэн оношоор хэвтсэн аж. Дээрх онош зөв тавигдсан бөгөөд эмч нарын буруутай үйл ажиллагаанаас болж нас бараагүй гэж шүүх эмнэлэг дүгнэжээ. Мөн “Талийгаач Д нь уг эмнэлэгт хэвтэж байх хугацаанд бүх биеийн цэгэн болон тосон массаж, панангиний уусмал 10,0, натрийн хлоридын уусмал 0,4-100 хувь, эуфиллин 2,4-10,0 зэрэг эмчилгээнүүдийг хийлгэжээ” гэсэн шинжээчийн дүгнэлт гарсан аж.

Иймд  “Сэтгэшгүй” эмнэлгийн ерөнхий эмч С.Хүрэлбаатар “ Би хэдхэн хоногт босгоод өгье гэсэн нь үнэн. Хэлсэн амандаа ч хүрсэн. 2-3 хоногийн дараа өөрөө бие засдаг болсон. Хүнтэй ярьж эхэлсэн. “Баярлалаа эмчээ” гэж хэлж байсныг нь санаж байна. Гэвч өөрийнх нь өвчин гэнэт сэдэрч яах ч аргагүй хурдан хугацаанд нас барсан. Тиймээс манай эмнэлэг хүний аминд хүрээгүй” хэмээв.

Г.Тэгшсүрэн