ЭМС-ын сайд Г.Шийлэгдамбыг энэ сарын 4-ний орой АТГ-аас баривчлан саатуулсан билээ. Түүнийг бусдаас авлига авсан үндэслэлээр эрүүгийн хэрэг үүсгэн шалгаж байгаа аж. Үүнтэй холбогдуулан ЭМС-ын сайд Г.Шийлэгдамба албан тушаалаасаа чөлөөлөгдөх хүсэлтээ Ерөнхий сайдад хүргүүлжээ. Энэ талаар Ерөнхий сайдын хэвлэлийн төлөөлөгч Ц.Мөнхтөр:

-Засгийн газрын гишүүн, ЭМС-ын сайд Г.Шийлэгдамба Монгол Улсын Ерөнхий сайд Ч.Сайханбилэгт хандан өргөдөл гаргасан байна. Уг өргөдөлд “АТГ-ын байцаагчид надад эрүүгийн тусгай ангиар хэрэг үүсгэж, бусдаас ихээхэн хэмжээний мөнгө авсан мэтээр тулган байцаасан. Тухайн үед миний албан өрөөндөө хувийн зорилгоор өөрийн олон жилийн танил нөхрөөс зээлсэн мөнгийг хадгалж байсан. Үүнийг хувийнхаа хэрэгцээнд зарцуулахаар төлөвлөж байсан юм. Би ямар нэг гэмт хэрэг хийгээгүй, төрийн эрх мэдэл, албан тушаалаа ашиглаж энэ мөнгийг олоогүй. Тиймээс би энэ мөнгийг АТГ-ын байцаагчид үзүүлсэн. Харин АТГ-аас надад эрүүгийн хэрэг үүсгэн шалгаж, хууль бусаар олсон мөнгө эсэхийг тогтоох нь зүйтэй гэдэг хэрэг үүсгээд ажиллаж байна. Монгол Улсын эрүүл мэндийн салбарт өдөр шөнөгүй ажилладаг олон мянган эмч сувилагч нарынхаа нэр хүндийг сэвтээхгүйг хичээж байна. Дээр нь шалгаж байгаа үйл явц улс төрийн нөхцөл байдлаас шалтгаалж багагүй хугацаа авах байдал үүсээд байгаа. Монгол Улсын сайд хүн өрөөндөө мөнгө хадгалж байсан нь зарим хэсэгт эргэлзээ төрүүлж байна. Цаашлаад Засгийн газрын тогтворгүй  нөхцөл үүсгэж болзошгүй учраас өөрийн хүсэлтээр Засгийн газрын гишүүн, ЭМС-ын сайдын үүрэгт ажлаас чөлөөлж өгөх хүсэлтээ гаргаж байгааг хүлээж авна уу. Эрүүл мэнд, спортын салбарт намайг урьж ажиллуулсан МАХН-МҮАН-ын “Шударга ёс”эвсэл, УИХ, Ерөнхий сайд, Ерөнхийлөгч нарт талархлаа. Энэ хэрэг Монгол Улсын шүүхээр цагаатна гэдэгт итгэлтэй байгаа. Үүний дараагаар та бүхэнтэй нэр цэвэр, нүүр бардам уулзах болно” гэсэн байна.

Түүний өргөдлийг Ерөнхий сайд хүлээж авлаа хэмээн мэдээллээ.  

Н.Энх