Ерөнхий сайд Ч.Сайханбилэгийг огцруулахаар гарын үсэг цуглуулж буй УИХ-ын гишүүн Г.Уянгын бичигт АН-ын нөлөө бүхий лидерүүд болох Х.Баттулга, Н.Алтанхуяг нар гарын үсэг зурсан гэх мэдээлэл худлаа гэдгийг албаны эх сурвалж тодотголоо.

Х.Баттулга гишүүн, Н.Алтанхуяг нар гарын үсэг зурсан талаар Г.Уянга гишүүн мэдээлэл өгөөгүй бөгөөд Зам тээврийн сайд М.Зоригт Г.Уянга гишүүний бичигт 19 гишүүн гарын үсэг зуржээ хэмээн ярьсан гэх мэдээлэл ч худлаа болсон юм.

АН-ын Ерөнхий нарийн бичгийн дарга Л.Эрхэмбаяр АН-ынхан Засгийн газраа огцруулахгүй хэмээн хэвлэлд мэдэгдэл хийсэн бол Шударга ёс эвсэл ч ирэх сонгууль хүртэл Засгийн газрын тогтвортой үйл ажиллагааг хангаж ажиллах бодлого тодорхойлсон гэдгээ мэдэгдсэн юм.

Гүйцэтгэх засаглалын үйл ажиллагаанд хөндлөнгөөс нөлөөлөх, улмаар АН-ын лидерүүд зөрчилдсөн мэтээр харагдуулах хүсэл хэсэг бүлэг хүнд, нам эвсэлд байгаа учраас энэ мэт ярианд итгэхгүй байх нь зүйтэй хэмээн эх сурвалж тодотгосон юм.

Б.Тогтох

Эх сурвалж: www.mminfo.mn