Өргөдлийн байнгын хорооны дарга О.Баасанхүү "Эрдэнэс Тавантолгой" ХК-ийн Цогтцэций суман дахь "Эв санааны нэгдэл" Үйлдвэрчний эвлэлийн дарга С.Эрдэнэ өөрийгөө галдан шатаахыг оролдсон үйл явдалтай холбогдуулж сэтгүүлчдэд мэдээлэл хийв. Тэрбээр иргэн С.Эрдэнээс энэ сарын 9-ний өдөр УИХ-ын Өргөдлийн байнгын хороонд ирүүлсэн өргөдлийг уншиж танилцуулсан.  Уг өргөдөлд “Компанийн удирдлагууд компанийн эдийн засгийн байдлыг сайжруулах нэрээр Хөдөлмөрийн тухай хуулийн 40.3, 40.5 дахь заалтуудыг ноцтой зөрчин 203 мэргэшсэн ажилтнаа халсан. Энэ нь Үндсэн хуулиар олгогдсон эрхийг минь ноцтой зөрчин, бусдад худалдсан хэмээн үзэж байна. Австралийн нэр бүхий компани, БНХАУ-ын харьяа компани болсныг хүлээн зөвшөөрч, хамтын ажиллагааны итгэлцлийн гэрээг Монгол Улсын газар нутаг дээр ажил үүрэг гүйцэтгэх гэрээ болгон өөрчлөх эрх зүйн чадамжгүй, хүчингүй гэрээ хэмээн тооцож байна” хэмээжээ.  Уг гэрээ нь Монгол Улсын хууль тогтоомжуудыг зөрчиж байгааг дурдаад, Засгийн газраас ажлын хэсэг байгуулан шалгуулж өгөх хүсэлтээ илэрхийлсэн байна.  Өргөдлийн байнгын хорооны дарга О.Баасанхүү мэдээлэлдээ:

-Нийгмийг айдаст автуулах гэсэн, тэр тусмаа өөрийнхөө амьд явах эрхийн эсрэг алхамыг Монгол Улсад хэнд ч хэзээ ч зөвшөөрч болохгүй. Энэ бол маш буруу. Нөгөө талаараа Монгол Улс тогтоосон хууль дүрэмтэй. Нэгэнт өргөдөл өгсөн юм чинь өргөдлийнхөө хариуг сонсох хэрэгтэй. Цаашилбал шүүх цагдаад хандах эрх нь нээлттэй. Энэ өргөдөл 11 дүгээр сарын 9-ний өдөр ирсэн. Хуулиараа 12 дугаар сарын 9-ний өдөр гэхэд хугацаа нь дуусах юм. Шаардлагатай гэвэл дахин нэг сараар сунгадаг. Иргэн С.Эрдэнийн өргөдлийг тус байнгын хороо судалж байгаа мэдээлэв.

Н.Энх