ТВ9 телевизээс зохион байгуулдаг “Би өөрөө гоо сайхан” буюу “Монгол лет ме ин 2” нэвтрүүлгийн оролцогч Ц.Удвалтай ярилцлаа.

-Юун түрүүнд хүссэн зорьсондоо хүрч, сайхан болоод ирсэнд баяр хүргэе. Хэзээ ирэв ээ?

-Баярлалаа. Маш их зориг тэвчээр гаргаж, өөрийнхөө санасанд хүрээд ирлээ, баяртай байна. Наймдугаар сарын 7-нд явсан. Солонгосын “Гранд” эмнэлэгт гурван сарын турш эмчилгээ хийлгээд эх орондоо ирээд 7 хонож байна. Даарч хөрж болохгүй учраас гэрийн дэглэм барьж байгаа.

-Нэвтрүүлэгт оролцох саналыг анх хэн тавьсан бэ?

-Хэн ч ороод үзээч, чи орох хэрэгтэй гэж санал тавиагүй. Би өөрөө л “Монгол лет ме ин 1” нэвтрүүлгийг үзээд оролцоод үзвэл яадаг бол гэж бодож эхэлсэн. Тэгээд судлаад оролцохоор шийдсэн. Тухайн үед Баянхонгор аймагт байсан болохоор эгчээрээ дамжуулж бүртгүүлж байлаа. Эхний 20 хүнийг ТВ9 телевизийн уран бүтээлчид шалгаруулсан. Шалгарсан 20 хүний зургийг авч материалтай нь хавсаргаад Солонгосын “Гранд” гоо сайхны эмнэлэг рүү явуулсан. Тус эмнэлгийн эмч нар ярилцаж байгаад Жавхлан эгч, Мөнхдэлгэр бид гурвыг эмчлэх боломжтой гэж хариу ирүүлсэн.

-Эрүүний гажиг засах хагалгаа хийлгэсэн гэсэн. Уучлаарай ямар шалтгааны улмаас ийм гажиг үүссэн  юм бол?

-2004 оны өвөл дөрөвдүгээр ангид сурч байхдаа машины осолд орсон юм. Тухайн үед ямар ч гажиг, муруйлт ажиглагдаагүй ч есдүгээр ангид сурч байх хугацаанаас л эрүү муруйж, шүд далийхаас гадна юм идэхэд маш сонин харагддаг болж эхэлсэн. Тэр гажиг нь турахаар илүү мэдэгдээд, нүүрээрээ жаахан таргалахаар мэдэгддэггүй байсан.

-Мэдээж хагалгаанд ороход өвдөлтийг маш их мэдэрсэн байх. Хэрхэн даван туулав?

-Хэсэгчилсэн гурван удаагийн хагалгаанд орсон. Анхлан ямар ч төсөөлөлгүй их эвгүй санагдаад, сандраад чичирч байлаа. Хоёр дахь хагалгаанд ороход “Одоо яах бол” гэж бодохоос урьдаасаа ч илүү айна. Хагалгааны дараа нэлээн өвдсөн ч тэсвэрлэхийн аргагүй өвдөлтийг мэдрээгүй. Мөнхдэлгэр хамгийн түрүүнд хагалгаанд орсон. Дараа нь Жавхлан эгч орсон. Жавхаа эгч бид хоёрыг айлгачих нь гээд л “Өвдөхгүй байна” гээд л байсан юм билээ. Яг өөрөө орчихоод гараад ирэхэд бас л нэлээдгүй өвдсөн.

-Гурван удаагийн хагалгаа хийлгэсэн гэхээр эрүү нүүрний гажиг засах хагалгаанаас дахиад өөр төрлийн хоёр хагалгаа хийлгэсэн гэсэн үг үү?  

-Мөнхдэлгэр бид хоёрын нүд жаахан жартгар, бүтэн биш тал нээгддэг байсан учраас нүд сэтэлж, томруулаад, давхраа оёсон. Бас миний хөх хэтэрхий том болохоор хөх багасгах хагалгаа хийсэн юм.

-Хөхөө томруулмаар байна гэж л бүсгүйчүүд ярьж байхыг сонссоноос биш багасгах талаар яриа сонсож байгаагүй юм байна. Ямар учраас хагалгаа хийлгэв ээ?

-Эсрэгээрээ миний хувьд хөхөө багасгана гэдэг миний хүсэл байсан. Дөнгөж ургаж байхад нь есдүгээр ангид байхдаа найзуудтайгаа тоглож байгаад юманд хүчтэй цохиж байсан юм. Тэгээд цочроосноос л болсон байх гэж боддог юм. Тэрнээс хойш л гэнэт гайхмаар томроод л эхэлсэн. Хэтэрхий том, унжуу, хүнд учраас эрүүл мэндэд сөрөг нөлөөтэй, нуруунд ачаалал өгч байнга бөгтийж явдаг байлаа. Эмчлүүлэхгүй, хагалгаа хийлгэхгүй яваад л байсан бол нурууны эмгэгтэй болох магадлалтай гэдгийг “Гранд” эмнэлгийн эмч нар хэлсэн.

-Хэрэв нэвтрүүлэгт ороогүй, өөрийн зардлаар явж хагалгаа хийлгэсэн бол хэр хэмжээний мөнгө төлөх байсан бол?

-Хагалгааны зардал Монгол мөнгөөр 165 сая төгрөг болох юм билээ. Энэ өндөр зардлаар хийлгэх хагалгааг өөрөөсөө нэг ч төгрөг гаргахгүй хийлгэсэндээ өөрийгөө азтайд тооцох юм. Азтайд тооцоод сууж байх хувь завшааныг олгосон ТВ9 телевизийн хамт олонд баярлаж байна. Солонгосчууд юмыг үнэхээр сэтгэлээсээ хийдэг юм шиг надад санагдсан.

-Хагалгааны дараа өөрийгөө харахад сэтгэгдэл ямар байсан бэ? Бас одоо?

-Дөнгөж хагалгааны дараа бол хавдар нь буугаагүй, эдгээгүй байсан болохоор жаахан эвгүй байсан. Өдөр өдрөөр хавдар буугаад улам л гоё болж эхэлсэн болохоор сэтгэл маш өндөр байсан. Би одоо өөрийгөө өдөржин толинд хараад л зогсоод баймаар, өөртөө маш их итгэлтэй болж байна. Хөөрхөн болсноос гадна хамгийн чухал нь эрүү нүүрний гажиг өвчнөөсөө салаад ирсэндээ л маш их баяртай байна.

-“Би хөөрхөн байна уу” гэж хүн бүхнээс асуумаар санагдах юм уу? Одоо хамгийн түрүүнд юу хиймээр байна?

-Тиймээ. Үнэхээр хөөрхөн байна уу гэж асуумаар байна. Гам барьж дуусаад хамгийн түрүүнд олон нийтийн газар, олон хүнтэй газар хоол иднэ. /Инээв.сур/ Хүмүүс муухайгаар харахгүй, муухайгаар бодохгүй гэхээс сэтгэл нэг л дүүрэн байна. Би уг нь Улаанбаатар дээд сургуулийн англи хэлний багшийн ангид сурч байсан. Багшийн мэргэжил гэдэг үргэлж хүүхдүүд дунд ажиллах учраас ийм байдалтай байж болохгүй  байх гэж бодоод хоёрдугаар курсээсээ сургуулиасаа гарчихсан. Харин одоо бүрэн эдгэрээд эмчийн мэргэжлээр сурна гэж бодож байна. Багаасаа эмч болно гэж мөрөөддөг байсан ч орхичихсон байсан. Солонгосын эмч нарыг хараад эмч болох мөрөөдлөө үргэлжлүүлэхээр шийдээд ирлээ.

-Өөртөө итгэлтэй болчихсон юм чинь одооноос харц дээгүүр алхана биз дээ?

-Тэгэлгүй яахав. Өдөр ирэх тусам гоё сайхан болоод байхаар дагаад сэтгэл санаа хүртэл өөдрөг, өөртөө итгэлтэй болчихдог юм байна. Гадуур явахад хүмүүсийн хандлага хүртэл нэг л өөр, найрсаг санагддаг болоод байгаа. Надад ийм гоё, эерэг хандлага мэдрэгдэж байхад сошиал ертөнц, фэйсбүүкээр хүмүүс их ондоо зүйл ярих юмаа. Өөрсдөө мэдрээгүй, хараагүй байж “Давхраа чинь сонин харагдаад байна. Та нарт туршилт хийчихсэн юм биш үү” гэх мэтчилэн сөрөг зүйл ярих юм. Бүрэн эдгэрээгүй байгаа болохоор сонин харагдаж байж болох л доо. Ер нь тэгээд би өөрөө л сайхан болж байвал бусдын юу гэх хамаагүй шүү дээ.

-Ярилцлагын араас сайн муу олон л сэтгэгдэл бичигдэх байх. Эмзэглэхгүй биз дээ?

-Эмзэглэхгүй ээ. Юунд эмзэглэх билээ дээ. Би л санасандаа хүртэл хөөрхөн болчихсон юм чинь  бусдын юу гэх нь хамаагүй гэж дахин хэлмээр байна.

Ярилцсанд баярлалаа.

Г.Тэгшсүрэн