Дэлхийн улс орнууд, тэр дундаа халдвар тархалт ихтэй Европын орнуудад коронавирусээс сэргийлэх вакциныг албан журмаар тарих шийдвэрийг ээлж дараалан гаргасаар байна. Энэ удаад Герман улс ийм шийдвэр гаргаж болзошгүй байгаа талаар DW агентлаг мэдээлжээ. 

Эх сурвалжийн мэдээлснээр, 2022 оны хоёрдугаар сар гэхэд бундестаг Германд коронавирусийн халдвараас сэргийлэх тарилгыг зайлшгүй хийлгэх журам гаргах асуудлыг хэлэлцэх гэнэ. Энэ талаар ХБНГУ-ын канцлерын үүрэг гүйцэтгэгч Ангела Меркель мэдэгджээ. 

Түүний өгүүлснээр, 2021 оны эцэс гэхэд үүнтэй холбоотой зохих зөвлөмжүүдийг боловсруулан гаргах хүсэлтийг  Ёс суртахууны асуудлын зөвлөлд тавих гэнэ. Мөн албан журмаар вакцинд хамруулахыг дэмждэг гэдгээ Меркель илэрхийлжээ. 

Түүнчлэн, Германы эрх баригчид жижиглэн худалдааны дэлгүүрүүдээр вакцингүй хүмүүсийг нэвтрүүлэхгүй байхаар болсон гэдгийг Меркель мэдээлсэн байна. Энэ шийдвэр эмийн сан болон супермаркетад хамааралгүй аж.

Г.Бямбасүрэн