Хонконгт коронавирусийн халдварын дотоодын дэгдэлт нэмэгдэж байгаатай холбоотойгоор хязгаарлалтын арга хэмжээнүүдийг чангатгахаар болжээ. Энэ талаар Засгийн газрын тушаал гарсныг Регнум агентлаг мэдээлсэн байна. 

Эх сурвалжийн мэдээлснээр, нэгдүгээр сарын 7-20-ны өдрүүдэд Хонконгт спорт, соёл, амралт чөлөөт цагийн объектууд тэр дундаа Диснейленд ажиллахгүй гэнэ. Нийтийн хоолны бүхий л цэгүүд 18.00 цаг хүртэл ажиллах бөгөөд үүнээс хойш гагцхүү хүргэлтийн болон авч явахаар үйлчлэх боломжтой аж. Харин сургууль, цэцэрлэг болон бусад боловсролын байгууллагууд хэвийн горимоор ажиллах юм байна. 

Хонконгт омикрон штамм тархсантай холбоотойгоор дотоодын дэгдэлт улам газар авсан юм. Халдварын дэгдэлт гарах бүрийд эмч нар нарийн хяналт тавьж, ойрын хавьтал болсон бүх хүнийг тусгаарлаж байгаа аж. Түүнчлэн нэгдүгээр сарын наймны өдрөөс эхлэн Австрали, Их Британи, Энэтхэг, канад, АНУ, Пакистан, Филиппин, Франц гэсэн найман оронтой харилцах агаарын харилцаагаа 14 хоног зогсоосон байна.

Г.Бямбасүрэн