Оросын сөрөг хүчний улс төрч Алексей Навальныйг алан хядлага, хэт даврах үйл ажиллагаатай холбоотой байгууллагуудын жагсаалтад оруулжээ. Мягмар гаригт Оросын Санхүүгийн мониторингийн холбооны алба энэхүү жагсаалтад Навальныйг багтаасан байна.

Ийнхүү Навальныйг алан хядлага, хэт даврах үйл ажиллагаатай холбоотой байгууллагуудын жагсаалтад бүртгэгдсэнээр хуулийн дагуу түүний банкан дахь хөрөнгүүдийг царцаах аж. Навальныйгаас гадна түүний ойрын хамтран зүтгэлтнүүд болох  Любовь Соболь, хуульч Вячеслав Гимади, Георгий Албуров, Руслан Шаведдинов нар багтжээ. 

Өмнө нь, өнгөрсөн оны есдүгээр сард Оросын Мөрдөн шалгах хороо Навальный болон Волков, Жданов, Соболь нарын түүний ойрын хамтран зүтгэгчдийн эсрэг хэт даврагч бүлгэм байгуулсан хэргээр эрүүгийн хэрэг үүсгэж байгаа талаар мэдээлж байлаа. Одоо тэд бүгд хилийн чанадад байгаа бол Навальный Орост хоригдож байгаа юм. 

Алексей Навальныйн хэрэг

Алексей Навальный 2020 онд "Новичок" бодисоор хордсоныхоо дараа Германд эмчилгээ хийлгүүлж байгаад, Орос руу 2021 оны нэгдүгээр сарын 17-ны өдөр буцан очсон өдрөө нисэх буудлаас баривчлагдсан юм. Өнгөрсөн оны хоёрдугаар сарын хоёрны өдөр Москвагийн шүүх түүний "Ив Роше"-ийн хэргээр авсан тэнсэн харгалзах ялыг биеэр эдлэх ял болгон өөрчилсөн. Ингэснээр гэрийн хороинд байсан хугацааг хасаж, Навальный хоёр жил зургаан сарыг шоронд өнгөрүүлэх болсон юм. 

2021 оны гуравдугаар сарын 31-ний өдрөөс эхлэн Навальный өөрийг нь эмчид үзүүлэхгүй байгааг эсэргүүцэн өлсгөлөн зарласан байна. Түүний хамтран зүтгэгчид болон өмгөөлөгчид нь Навальныйн бие муудсан, шаардлагатай эм тариа оруулахгүй байгаа талаар удаа дараа мэдэгдэж байлаа. Мөн хорих газрын ажилтнууд хүчээр хооллохыг завдсан гэж Навальный мэдэгдэж байв. Дөрөвдүгээр сарын 19-ний өдөр түүнийг хорих газрын нутаг дэвсгэр дээрх хоригдлуудыг эмчлэх эмнэлэгт шилжүүлсэн гэж мэдэгдсэн ч Навальныйн хамтран зүтгэгчид өөрсдөө холбоо тогтоотлоо үүнд итгэх аргагүй хэмээн мэдэгдэж байлаа. Тэрбээр өнгөрсөн оны дөрөвдүгээр сарын дундуур өлсгөлөнгөө зогсоосон юм. 

Европын холбоо, АНУ, Их Британи, Балтийн орнууд Навальныйд зохих ёсоор эмнэлгийн тусламж үзүүлэх, өмгөөлөгчидтэйгээ харилцахыг зөвшөөрөхийг Оросын эрх баригчдад хандан уриалсан юм. Харин АНУ Навальныйг нас барсан тохиолдолд "шангаа хүртэнэ" гэж Оросыг сүрдүүлж байв. 

Г.Бямбасүрэн