Орос, Хятадын хоорондын Амар мөрөн дээгүүрх гүүрэн дээр барьж буй төмөр замын барилгын ажил дууссан талаар РИА Новости мэдээлжээ. Энэ төмөр замын Хятадын талаас барих хэсэг 2018 онд дууссан юм. 

"Энэ дэд бүтцийн байгууламж нь Орос, Хятадын эдийн засгийн хамтын ажиллагаа хөгжүүлэх, тэр дундаа нөхөрсөг бус орнуудын зүгээс сорилт тулгарч байгаа нөхцөлд хоёр орны хамтын ажиллагааг өргөжүүлэхэд ихээхэн түлхэц болно" гэж Алс Дорнодын холбооны тойрог дахь Ерөнхийлөгчийн бүрэн эрхэт төлөөлөгч  Юрий Трутнев мэдэгджээ. 

Одоо БНХАУ төмөр замаа нээмэгц Оросын тал гүүрнийхээ хэсгийг нээх юм байна. Энэ гүүр 2,2 км урттай, гүүрэн дээр Орос болон Хятадын стандартыг хослуулсан холимог цариг бүхий төмөр зам байгуулжээ.

Г.Бямбасүрэн