Оростой хийж буй дайнд Украин хурдан ялах ёстой гэж Украины Ерөнхийлөгч Владимир Зеленский ард түмэндээ хандсан ээлжит мэдэгдэлдээ онцолжээ. 

"Өнөөдөр зургадугаар сарын 22. ХХ зууны түүхэнд үүрд үлдсэн, хэзээ ч давтагдах ёсгүй ч давтагдаж байгаа тэр дайны хохирогчдын дурсгалыг хүндэтгэх, эмгэнэн гашуудах өдөр. Өнөөдөр, зургадугаар сарын 22-ны өдөр нацистуудын хийсэн шиг үйлдлийг Орос улс хоёрдугаар сарын 24-ний өдөр хийсэн талаар хаа сайгүй хангалттай ярьсан. Нэг л зүйл нэмж хэлье. Тухайн үед түрэмгийлэгч довтолж, ялагдал хүлээх хүртэл 1418 өдөр өнгөрсөн. Бид газар нутгаа чөлөөлж, ялах ёстой. Гэхдээ тухайн үеийнхээс хурдан ялалтад хүрэх ёстой. Энэ бол үндэстний зорилго. Бид зорилгоо хэрэгжүүлэхийн тулд өдөр бүр ажиллах ёстой. Зөвхөн улс биш, иргэн бүр, чадах хэмжээгээрээ хичээх хэрэгтэй" хэмээн Зеленский мэдэгджээ.

Энд дуулгахад, ОХУ-д жил бүр зургадугаар сарын 22-ны өдөр "Нэхэн дурсах, эмгэнэн харуусах өдөр"-ийг тэмдэглэдэг. Учир нь 1941 оны энэ өдөр дайн эхэлж байлаа. Хүн төрөлхтний түүхэн дэх хамгийн аймшигт, хамгийн их цус асгаруулсан энэ дайн 1418 хоног үргэлжилж, 27 сая гаруй хүний амь насыг авч одсон юм. 

Г.Бямбасүрэн