Украины улс төрийн зүтгэлтэн Гончаренко өнгөрсөн долоо хоногоос эхлэн “Эрх чөлөөт Кавказын төлөө” фракц дундын нэгдлийг тэргүүлэх болжээ. Энэхүү нэгдэл нь 2019 оны намраас эхлэн Украины парламентад үйл ажиллагаа явуулж буй “Краснодарын хязгаарыг Оросын эзлэн түрэмгийллээс чөлөөлөхийн төлөөх” бүлгийг өөрчлөн шинэчилсэн бүлэг аж. 

Еadaily хэвлэлийн бичсэнээр, Украины Ерөнхийлөгч асан Петр Порошенкогийн намын гишүүн Алексей Гончаренко намынхныхаа хамтаар Оросыг Сибирь, Алс Дорнодоос шахахаар төлөвлөж байгаа бөгөөд дараа нь “Оросоос чөлөөлсөн” эдгээр газар нутаг дээр “Украинд нөхөрсөг ханддаг улс орон” байгуулж, цаашлаад Оросын дорно хэсгийг бүхэлд нь Украинд нэгтгэх зорилготой гэнэ. 

Порошенкогийн хамтран зүтгэгчид энэ “агуу үйлс”-дээ туслах хүнийг Монголоос олсон гэж нийтлэлд өгүүлжээ. Тэр хүн  нь Монгол Улсын Ерөнхийлөгч асан Цахиагийн Элбэгдорж гэнэ. 

“1990 онд цэрэг, улс төрийн сэтгүүлч, коммунист дэглэмд зүтгэж байсан Элбэгдорж чимээгүй хувьсгал гэгддэг, БНМАУ –д коммунизмын эсрэг эргэлтийг удирдаж байв. Энэ эргэлтийн дүнд МАХН-ы Улс төрийн товчоо огцорч, Монгол Улсыг барууны хэв маягийн ардчилсан орон гэж зарласан” хэмээн eadaily цахим хэвлэлийн нийтлэлд өгүүлжээ. Түүнчлэн Монгол дахь коммунизмын эсрэг хөдөлгөөн Балти орчим, Азербайжан, Гүрж, Украин дахь зөвлөлтийн эсрэг, Оросын эсрэг хөдөлгөөнүүдийн нарийн хуулбар байсан гэж нийтлэлд онцолсон байна. 

Цаашлаад энэ нийтлэлд, Ц.Элбэгдоржийг Украин болон украин хэлийг сайн мэддэг, Львовт суралцаж байсан, Зөвлөлтийн эсрэг, барууны чиг баримжаатай суртал ухуулгыг Монголын армийн гол сэтгүүлийн нүүрэн дээрээс тараадаг байсан зэргээр бичжээ. Түүнчлэн Элбэгдорж 2002 онд Харвард төгссөн, бага Жорж Бушийн тэтгэлэг хүртэн суралцаж төгсөөд Монгол руу буцан, тэндээ хоёр дахь удаагаа Ерөнхий сайд болсон хэмээн онцолсон байна. 

“Одоо Элбэгдорж Монголд барууны санхүүжилтээр барууны чиг хандлагыг “зөөлөн аргаар түгээн дэлгэрүүлэх” ажлыг гүйцэтгэдэг. Гэхдээ Элбэгдорж олон тулгуурт Монгол Улсыг Оростой ашигтай харилцаагаа хадгалж үлдээсэй гэж хүсдэг” хэмээн eadaily хэвлэлийн нийтлэлд бичсэн байна. 

Эх сурвалжийн бичсэнээр, Украины улс төрч Алексей Гончаренко, Цахиагийн Элбэгдорж нар өнгөрсөн долоо хоногийн сүүлээр Францын Страсбург хотноо болсон Европын зөвлөлийн Парламентын чуулганы хуралдаан дээр уулзжээ. Улмаар Элбэгдоржоос “урам зориг авсан” Гончаренко Оросын МГИМО, Москвагийн их сургууль, Ард түмнүүдийн найрамдлын их сургуулийн оронд Украины Львов, Киевийн их дээд сургуулиуд дэлхий даяар Украиныг баримтлагч элитийг бэлтгээсэй гэж хүсдэг гэнэ. Гэхдээ үүний тулд “Орос задрах ёстой” гэж Гончаренко үздэг хэмээн нийтлэлд өгүүлжээ. 

Г.Бямбасүрэн