ОХУ Украинд дайн өдүүлснээс хойш тав дахь сар дээрээ тулаан үргэлжилж байна. Энэ дайнд Оросын талаас буриадууд ихээр татагдаж, амиа алдаж байгаа талаарх мэдээлэл гадаадын хэвлэлүүдээр гарсаар байгаа юм. 

Ийнхүү олон эрчүүд нь дайнд явсан Буриадад эсэргүүцлийн акц зохион байгуулсан талаар "Эрх чөлөө" радио мэдээллээ. Эх сурвалжийн мэдээлснээр, Буриадын цэргийн алба хаагчдын эхнэрүүд нөхрүүдийг нь дайнаас буцаахыг шаардсан байна. 

Тэд нэгдэн цуглаж, Буриадын тэргүүн Алексей Цыденовт хандан шаардлага хүргүүлсэн бөгөөд энэ шаардлагадаа нөхрүүдийг нь нэгдүгээр сард "цэргийн сургуулилалт" руу явуулсан, гэтэл одоо Украинд байлдаж байгааг онцолжээ. Мөн Оросын цэргийн алба хаагчид хээрийн байлдааны нөхцөлд дөрвөн сарыг өнгөрүүлсэн, ихэнх нь өвдсөн байгаа хэмээсэн байна.

"Телевизийн сувгаар энэ аймшигт үнэний талаар огт ярихгүй байна. Бүгд л айж байгаа, дуугүй байх тушаал авцгаасан. Энэ шударга бус дайнд цэргүүд амиа алдаж байна! Бид хөвгүүдийг минь, нөхрүүдийг минь эх оронд нь буцаахыг шаардаж байна" гэж цэргийн алба хаагчийн эхнэр Вера Партилхаева Буриадын тэргүүнд хандан шаарджээ.

Түүний өгүүлснээр, энэ эсэргүүцэлд Тацинскийн танкийн бригадын цэргийн алба хаагчдын эхнэрүүд нэгдсэн гэнэ. Энэ бригадаас 30 хүн амиа алдсан гэсэн мэдээлэл одоогоор ил болжээ.

Дайны золиос 

Хоёрдугаар сарын 24-нөөс зургадугаар сарын дуднд үе хүртэлх хугацааны албан мэдээллээр, Буриадаас дайнд явсан 184 хүн амиа алдсан байна. Энэ бол гагцхүү батлагдсан, албан ёсоор зарласан тоо. ОХУ өнөө хүртэл "төрийн нууц" гэсэн шалтгаанаар амиа алдагсдын тоог зарлахгүй байгаа юм. 

Гэсэн ч Орос маш их хүнээ алдсан, тэр дундаа үндэсний цөөнхүүд дайнд татагдаж, олноор амиа алдаж байгаа талаар Оросын хараат бус хэвлэлүүд мэдээлсээр байна.  Харин Буриадад энэ цэрэг татлагыг “эх орноо хамгаалах ариун үйлс” хэмээн нэрлэж байгаа бөгөөд буриадуудыг Украинд байлдахыг уриалж байв.  

Тодруулбал, өнгөрсөн сарын сүүлээр Буриадын “Цэргийн ахан дүүс” төрийн бус байгууллага олон нийтийн сүлжээгээр дамжуулан Украин дахь “тусгай цэргийн ажиллагаанд” сайн дурын цэргээр оролцохыг оршин суугчдад хандан уриалсан юм. Тэд энэ дайныг "эх орноо хамгаалах ариун үйлс" хэмээн нэрлэж, сайн дурынхныг бүртгэх, дайны талбар руу илгээх ажлыг одоо ч хийж байгаа талаарх мэдээлэл олон нийтийн сүлжээнд тархжээ.

ОХУ-ын хамгийн буурай субъектүүдийн нэг гэгддэг Буриад улс ердөө нэг сая хүрэхгүй хүн амтай. Харин эндээс татагдан явсан цэргүүдээс хэдийнэ 184 хүн амиа алджээ. Мөн Улаан-Үд хотод өдөр бүр шахам цэргийг сүүлчийн замд нь үдэх ёслол болдог, зай талбай хүрэлцэхгүй тул хүүхдүүд спортоор хичээллэдэг спортын ордны нэг талд шарилыг байршуулдаг гэж Тайга.инфо мэдээлж байлаа

Буриад залуус дайнд ийнхүү амиа алдаж байгааг эсэргүүцсэн Буриадаас гаралтай залуус нэгдэн "Чөлөөт Буриад" нэртэй олон улсын, дайныг эсэргүүцэх сан байгуулсан талаарх мэдээлэл дөрөвдүгээр сард гарч байсан юм. Энэ сангийнхан дайныг зогсоох, Кремлийн суртал ухуулгатай тэмцэх, буриадуудыг "Орос ертөнцийн гол хамгаалагч" гэдэг байдлаас салгах зэрэг хэд хэдэн зорилго дэвшүүлжээ.

Санг үүсгэн байгуулагчдын нэг, сэтгүүлч Гармажаповагийн өгүүлснээр Буриадын залуус мөнгө олохын тулд хойд зүг рүү ажиллахаар явах, эсвэл гэрээт цэргийн алба хаадаг, ингэснээр ипотекийн зээлд хамрагдаж, орон байртай болж чаддаг гэнэ. 

Г.Бямбасүрэн