Наймдугаар сарын 10-ны өдөр Тажикистанд "Бүс нутгийн хамтын ажиллагаа-22" цэргийн сургуулилалт эхэлжээ. Энэ сургуулилалтыг АНУын Төв командлалаас зохион байгуулж байгаа бөгөөд Душанбед наймдугаар сарын 20-ны өдрийг хүртэл үргэлжлэх юм байна. 

Команд, штабын сургуулилалтад АНУ, Тажикистан, Кыргызстан, Монгол, Пакистан, Узбекистаны төлөөлөгчид оролцож байгаа аж. "Бүс нутгийн хамтын ажиллагаа" нь тогтвортой байдлыг хангах, терроризмтай тэмцэх олон үндэстний ажиллагааг бэхжүүлэх, Төв болон Өмнөд Ази, АНУ болон бусад оролцогч орнуудын хамтын ажиллагааг хөгжүүлэхэд чиглэгдсэн, жил бүр уламжлал болгон зохион байгуулдаг сургуулилалт юм.

Энэ сургуулилалт 2004 оноос хойш жил бүр зохион байгуулагдаж, харин цар тахлын улмаас завсарлаад энэ жил Тажикистанд зохион байгуулагдахаар болсон байна.

Г.Бямбасүрэн