Украины нутагт байх Запорожийн атомын цахилгаан станцын орчимд наймдугаар сарын тавны өдрөөс буун дуу гарч, улмаар нөхцөл байдал хурцдаж болзошгүй тул НҮБ-ын Аюулгүйн зөвлөлийг ОХУ шуурхай зарлан хуралдуулах санаачилга гаргаснаар зөвлөлийн хуралдаан болсон юм. 

Атомын цахилгаан станцыг аюулд оруулж байгаад сөргөлдөгч талууд нэгнээ буруутгасаар байгаа. Наймдугаар сарын 11-нд гэхэд л Запорожийн атомын цахилгаан станц руу украинчууд буудаж, систем гэмтсэн гэж ОХУ-ын Батлан хамгаалах яам мэдэгджээ. 

"Наймдугаар сарын 11-ний өдөр Украины Зэвсэгт хүчний 44 дүгээр бригад Никополь суурингаас 152 мм зэвсгээр атомын цахилгаан станц руу буудсан. Үүний улмаас дулааны цахилгаан станц болон цөмийн реакторын хөргүүрийн төхөөрөмж хэсэгчлэн гэмтсэн" гэж ОХУ-ын Батлан хамгаалах яам мэдэгджээ. 

Түүнчлэн хэдийгээр хөргүүрийн систем гэмтсэн ч "Оросын Зэвсэгт хүчний цэргүүд цөмийн эрчим хүчний объектыг халхлах чадварлаг, зөв, үр дүнтэй үйлдлийн ачаар АЦС-ын нэн чухал дэд бүтэц гэмтээгүй, реакторуудын ажиллагаа хэвийн байна" хэмээн  онцолжээ.

Энд дуулгахад, Запорожийн атомын цахилгаан станц нь Европ дахь хамгийн том цөмийн станц юм. Энэ станц ВВЭР-1000 зургаан  блоктой. Эхний блокыг 1984 оны 12 дугаар сард, зургаа дахийг 1995 оны 10 дугаар сард ашиглалтад оруулж байв. Одоогоор Запорож мужийн зарим газар Оросын цэргүүдийн хяналтад байгаа юм.

Г.Бямбасүрэн