ОХУ-д хэсэгчилсэн дайчилгааг есдүгээр сарын 21-ний өдөр зарлаж, орон даяар дайчилгаа явуулж байна. Оросын эрх баригчид 300 мянган цэргийн үүрэгтнийг Украин руу илгээнэ гэж байгаа ч Владимир Путиний тушаалын нууц заалтад нэг сая хүртэлх хүнийг зарлан дуудах талаар тусгасан гэж "Новая газета. Европа" сонин мэдээлжээ. Харин "Медуза" сайтын мэдээлснээр, Орос даяар цэргийн үүрэгтнүүдийг ажил дээрээ, гэртээ байхад нь, зарим тохиолдолд шөнө дунд ч зарлан дуудах хуудас гардуулж байгаа гэнэ. "Медуза" сайтын сэтгүүлчид зарлан дуудах хуудас авсан иргэдтэй уулзаж, ярилцсаныг товчлон хүргэж байна.

"Медуза" аюулгүй байдлыг бодолцох үүднээс ярилцсан хүмүүсийнхээ овгийг тавиагүй аж.

Санкт-Петербург. Алексей 40 настай, арга хэмжээ зохион байгуулах салбарт ажилладаг

"Есдүгээр сарын 21-ний өглөө 11 цагийн орчимд Петроградын цэргийн комиссарын газраас залгасан. Маргааш эсвэл нөгөөдөр паспорт, цэргийн үүрэгтний үнэмлэхээ аваад комиссарын газар ирэх хэрэгтэйг дуулгасан юм. Тэгээд намайг ирж амжих эсэхийг асуусан. Очихыг хичээе гэж хариулаад л бидний яриа дууссан.

Мэдээж би сандарсан. Юу ч болж мэднэ шүү дээ. Эхлээд сургалтад явуулна гэж байгаа ч дараа нь сургуулилалт нь Украины нутаг дээр очсоноор дуусвал яах вэ? Өмнө нь ийм юм болж байсан. Дахиад давтагдахгүй гэх баталгаа байхгүй шүү дээ. Би цэргийн комиссарын газар руу очихоосоо өмнө айгаагүй, гэхдээ үүнд бэлтгэх ёстой. Тиймээс маргааш лав очихгүй. Хуульчлын зөвлөгөөг уншиж байна. Дараа нь л юу хийхээ шийднэ дээ. Намайг тийм ч амархан дайн руу явуулчхаж чадахгүй. 

Хамгийн инээдтэй нь, надад цэргийн туршлага байхгүй, би цэргийн мэргэжил эзэмшээгүй. Цэргийн зарлан ирдэг насан дээрээ би Омскод бүртгэлтэй байсан ч өөр газар амьдарч байсан учраас цэргийн комиссарын газар намайг олоогүй юм. Би 28 нас хүрээд, Омск хотод ирэхэд цэргийн алба хаагаагүйн төлөө торгууль төлөх болсон. Ингээд торгуулиа төлөхөд надад "бэлтгэл байлдагч" гэсэн бичигтэй цэргийн үүрэгтний үнэмлэх өгсөн юм"

Приморийн хязгаар Спасск-Дальний. Николай (ярилцагчийн хүсэлтээр нэрийг өөрчилсөн) 24 настай.

"Надад цэргийн зарлан ирсэн. Би байлдах хүсэлгүй байна, би үхэл рүүгээ л явж байна гэсэн үг. Би улс төр сонирхдоггүй, энэ талаар ярих нь зохистой эсэхийг ч мэдэхгүй байна. Би бол улс төр сонирхдоггүй жирийн л нэг залуу. Путин ч юм уу хэн нэгэн буруутай гэдгийг ойлгож байна. Гэхдээ би үүнд саад болж чадахгүй.Би дайныг дэмжигч биш, одоогийн тохиолдолд бол бид бусдын нутгийг эзлээд дараа нь үүнийг өөрийнхөө юм шиг хамгаалж байна. 

Ээж минь их санаа нь зовж, хэцүү байгаа. Юу хийхээ мэдэхгүй байгаадаа л ихэд айж байна. Хэн ч юу ч хийхээ мэдэхгүй байгаа. Явмаар байна, гэхдээ хамгийн гол нь хаашаа явах вэ, явж чадах уу гэдэг нь л асуудалтай: 

Алексей (ярилцагчийн хүсэлтээр нэрийг өөрчилсөн) 22 настай.
 

"Намайг Москвад эсэргүүцлийн жагсаалд оролцох үеэр цагдаагийнхан саатуулж, дараа нь цэргийн комиссар ирж зарлан дуудах хуудас өгсөн. Маргааш нь дуудсан газарт нь очоод намайг шалгасны дараа явуулсан.

Одоо болж буй үйл явдалд би тун таагүй ханддаг. Дайн бол аллага, үхэл. Оюутнуудыг татахгүй гэж Шойгу хэлсэн ч үүнтэй холбоотой албан баримт огт гараагүй. Би одоо санаа зовж байна. Миний дүү цочролд орсон, маргааш тэр 18 нас хүрэх юм. Дүүгээ энэ бүхнээс зугтаалгахын тулд би төлөвлөгөө гаргасан. Харин дүү мань эх орноосоо явах хүсэлгүй байгаа. Түүнийг гадагш явуулах талаар ярьж эхэлмэгц тэр цочролд орсон. Энд л сурч, энд л ажиллана гээд эх орондоо л бүх төлөвлөгөөгөө гаргасан гэдгээ хэлж байлаа. Харин одоо тэр яахаа, цааш хэрхэн амьдрахаа мэдэхгүй байна" 

Никита, 29 настай 

"Би суурин амьдардаг хүн биш. Тэд намайг одоо амьдарч байгаа хаягаар олоод ирнэ эгж бодохгүй л байна. Би хэзээ ч армид алба хааж байгаагүй. Арван жилийн өмнө цэргийн комиссарын гаазр очсон ч эрүүл мэндээ тэнцээгүй юм. 

Би одоо цэрэгт алба хаах шаардлагатай болсон ч гэлээ энэ гэмт хэргийн шинжтэй, эзлэн түрэмгийлэх дайныг би дэмжиж байгаа гэсэн үг биш. Өнөөдөр би штаб руу очих ёстой байсан. Очоогүй. Би гадагшаа л явмаар байна. Гэвч мөнгө ч алга, баримт бичиг ч алга. Аав ээж туслах хүсэлтэй байгаа ч тэд мөн л баян хүмүүс биш. Би цэрэг татлагаас нуугдана, байлдахыг хүсэхгүй байна. Бүр болохоо байвал хуруугаа тайрна. Гэхдээ өөрийгөө буудахгүй"

Орсоын хараат бус хэвлэл болох Медуза сайтын сэтгүүлчдийн уулзсан залуус ийнхүү ярьжээ. Энэ зуур Буриадад дайчилгаа ид өрнөж байна. Оросын Батлан хамгаалахын сайд Сергей Шойгу оюутнууд болон хугацаат цэргийн алба хаагчдыг татахгүй хэмээн мэдэгдэж байгаа ч олон нийтийн сүлжээнд бичсэнээр  Буриадын Улсын Их Сургуулийн оюутнуудыг есдүгээр сарын 22-ны өдөр хичээлээс нь шууд авч явахаар цэргийн цагдаагийнхан автобустай ирсэн гэнэ. Түүнчлэн цэргийн алба хаагаагүй, олон хүүхэдтэй эрчүүдэд ч цэргийн зарлан дуудах хуудас ирж байгаа талаар Буриадын олон нийтийн сүлжээний хэрэглэгчид бичжээ. 

Г.Бямбасүрэн