Сүүлийн үед Хойд Солонгос пуужин хөөргөх нь олширч, Солонгосын хойг дахь нөхцөл байдал тогтворгүй байгаа юм. Ердөө өчигдөр буюу 11 дүгээр сарын 17-нд пуужин харваж байсан Хойд Солонгос 11 дүгээр сарын 18-ны өдөр дахин пуужин харважээ. 

Баасан гарагт харвасан пуужин Хоккайдо арлаас баруун зүгт, Японы эдийн засгийн бүсэд унасан байна. Энэ талаар Японы Ерөнхий сайд Фумио Кишида мэдэгджээ. "Хойд Солонгос баллистик пуужин хөөргөсөн. Энэ пуужин Хоккайдо арлаас баруун зүгт, манай орны эдийн засгийн бүсэд унасан" хэмээн Кишида мэдэгдсэн байна.

Хойд Солонгос баасан гарагт туршсан пуужин нь тив алгасах баллистик пуужин байсан бөгөөд нислэгийн энгийн чиглэлээр АНУ-д ч хүрч болзошгүй байсан гэнэ. Энэ талаар Японы Батлан хамгаалахын сайд Ясуказу Хамада мэдэгджээ. 

"Нислэгийн зай хошууны жин болон бусад хүчин зүйлээс хамаарч 15 мянган км зайг ч давж мэднэ. Ингэснээр Хойд Солонгосын пуужин АНУ-д хүрэх боломжтой"  хэмээн Хамада мэдэгдсэн байна. 

Энд дуулгахад,  БНАСАУ энэ онд нийт 34 удаа пуужин харважээ. Үүнээс 10 удаад нь тив алгасах баллистик пуужин хөөргөж байв. Хамгийн сүүлд 11 дүгээр сарын гуравны өдөр тив алгасах пуужин хөөргөсөн байна.

Г.Бямбасүрэн