Цахилгаан машин үйлдвэрлэгч Tesla компанийн машинтай холбоотой асуудлууд ар араасаа гарсаар байна. Саяхан Австралиас 15 мянган машинаа эргүүлэн татсан Тесла компани энэ удаад Хятадаас хагас сая орчим машинаа эргүүлэн татахаар болжээ. 

SCMP сонины мэдээлснээр, арын гэрлийн хэвийн ажиллагааг алдагдуулахуйц гэмтэл программ хангамжид илэрсэн тул Хятадаас 435 мянган машиныг эргүүлэн татахаар болжээ. Энэ гэмтэл нь осол гарах нөхцөлийг бүрдүүлж болзошгүй гэж үзсэн байна. Тесла компани Model 3, Model Y загварын цахилгаан машинуудыг татах аж. Түүнчлэн өмнө нь программ хангамж болон аюулгүйн бүстэй холбоотой асуудлаас болж 80 мянган автомашин эргүүлэн татжээ. 

Ингэснээр Тесла компани өнгөрсөн оны 12 дугаар сараас хойш өнөөг хүртэл нийтдээ таван удаа Хятадаас бүтээгдэхүүнээ эргүүлэн татаж байна. Энэ нь цахилгаан машины эрэлтэд ч нөлөөлж, хэрэглэгчид Теслагийн машиныг сонгох нь багассан тул Тесла компани Хятадад зарах цахилгаан машиныхаа үнийг бууруулж байв.

Энд дуулгахад, Хятадаас машинуудаа татах болсон энэ л шалтгаанаар Австралид нийлүүлсэн 15 мянга гаруй автомашиныг зах зээлээс эргүүлэн татаж байгаа юм. Тодруулбал,  2022 онд Австралид зарагдсан Tesla Model 3, Model Y загварын 15 914 машиныг эргүүлэн татах ажлыг эхлүүлжээ.

Г.Бямбасүрэн