Туркийн Карабюк мужийн мод боловсруулах үйлдвэрийн эзэн  Ферхат Карапынар Туркийн гамшгийн бүсэд хүмүүнлэгийн тусламж цуглуулах аяны бэлгэдэл болсон, Азербайжаны иргэн Сервер Беширлгийн машины макетыг бүтээжээ. Энэ талаар Анадолу агентлаг мэдээлсэн байна.

Карапынар машины макет бүтээх урлагаар хичээллээд таван жил болж байгаа гэнэ. Энэ удаад тэрбээр хоёрдугаар сард тохиосон байгалийн гамшгийн дараа туркчүүдэд туслахаар хуучин машин дээрээ тусламж ачин явж байгаад олны хараанд өртөж, улмаар сайн үйлсийн бэлгэдэл болсон Беширлигийн машины макетыг бүтээжээ. Беширлигийн машиныг гэрэл зурган дээр буусан шиг буюу олон хөнжил гудас ачсан байдлаар бүтээсэн байна. 

Энд дуулгахад, Туркийн далбаа хатгаж, машиныхаа тээш хийх хэсэг, тэр бүү хэл дээд талд нь ч дүүрэн тусламжийн бараа ачиж яваа эрийн зураг хоёрдугаар сард болсон газар хөдлөлтийн дараахан олон нийтийн сүлжээгээр ихээхэн тархаж байв. Энэ зураг дээрх эр нь Азербайжаны 33 настай иргэн байсан бөгөөд  "ах дүү орныхоо хүмүүст туслах нь миний үүрэг" хэмээн хэвлэлд ярьж байлаа.

Тэрбээр өөрөө ядуу зүдүү амьдардаг ч байгаагаараа туслахаар шийдэж, хамаатнууд руугаа очиж, Туркийн газар хөдлөлтийн улмаас хохирсон хүмүүст шаардлагатай бүхнийг цуглуулсан гэнэ. Ингээд тэрбээр 1981 оны хуучин машин дээрээ хэдэн гудас, даавуун ууттай эд зүйл баглаж, ачааны хэсэгт тусламжийн бараа багтахгүй байсан тул хаалгүй тэр чигт нь онгорхой орхин замдаа гарч, тусламжийн бараагаа Баку хотод байгуулагдсан тусламж цуглуулах төвд хүргэж өгч байв. 

Түүний гэрэл зургийг гудамжинд санамсаргүй байхад нь авч, олон нийтийн сүлжээнд тавьснаар Беширли алдаршиж, хэвлэлүүдийн анхааралд өртсөний дээр бизнесменүүд түүнд төрөл бүрийн бэлэг сэлт амлаж байлаа. Харин Беширли энэ бүхнээс татгалзаж, шан харамж авахын тулд хүмүүст туслаагүй хэмээж байв.