Хятадын эрх баригчид Нинся болон Ганьшу мужид байх исламын шашны олон зуун сүмийг хааж, заримыг нь нураасан талаар Human Rights Watch хүний эрхийн байгууллагын шинэ тайланд өгүүлжээ. 

Энэ бүс нутаг нь Шинжааны дараа мусульманчууд хамгийн ихээр амьдардаг хоёр дахь бүсэд тооцогддог юм. Хятадад нийтдээ 20 сая мусульман амьдардаг гэсэн тоо бий. 

"Сүмийг хааж, нурааж, өөрчилж байгаа нь Хятадад исламын шашин шүтэхийг хязгаарлах шат дараатай арга хэмжээнийх нь нэг хэсэг" гэж Human Rights Watch байгууллагын Хятадын асуудал эрхэлсэн захирал Майя Вонг мэдэгдсэн байна. Мөн энэ үйлдэл нь шашин шүтэх эрх чөлөөг зөрчиж байгаа хэрэг гэж тус байгууллага мэдэгджээ. 

Хүний эрхийг хамгаалагчид Нинся дахь хоёр тосгоны хиймэл дагуулын зургийг шинжлэхэд 2019-2021 оны хооронд нутгийн эрх баригчид долоон сүмийн оройг буулгаж, дөрвөн сүмийг өөрчилсөн нь тогтоогдсон байна.

Нийтдээ, 2020 оноос хойш Нинсяд 1300 орчим сүмийг хааж, өөрчилсөн гэж хүний эрхийн байгууллагынхан онцолжээ.

Г.Бямбасүрэн