ХАМАС, Израил улс дайн эхэлснээс хойш сар гаруйн хугацааны дараа ХАМАС бүлэглэлд олзлогдсон хүмүүсийг суллах болон Газын зурваст хүмүүнлэгийн тусламж хүргэх зорилгоор дөрвөн өдрийн эвлэрэл зарласан. Энэ эвлэрлийн хүрээнд 50 гаруй олзны хүн суллагдаж, Газын зурвас руу хүмүүнлэгийн тусламж ачсан цуваа нэвтэрсэн юм. 

Израилын Ерөнхий сайд Биньямин Нетаньяху ням гарагт АНУ-ын Ерөнхийлөгч Жо Байдентай утсаар ярихдаа дөрвөн өдрийн хугацаатай түр завсарлага дуусмагц Газын зурвас дахь цэргийн ажиллагааг бүрэн хүчин чадлаар нь сэргээнэ хэмээн мэдэгдсэн байна. 

Түүнчлэн сөргөлдөгч талууд урьдчилан хэлэлцэж байсны дагуу өдөр бүр 10 хүнийг олзноос суллавал эвлэрлийн хугацааг сунгахыг дэмжинэ гэж Нетаньяху мэдэгджээ. 

Газын зурвас дахь олзны хүмүүсийг Израилын шоронд байх палестинчуудаар солихын тулд цэргийн ажиллагааг дөрөв хоногийн хугацаатай түр зогсоосон бөгөөд энэ эвлэрэл өнөөдөр буюу 11 дүгээр сарын 27-ны даваа гарагт дуусах юм.