H1N2 гахайн ханиадны вирусийн халдвар хүнээс илэрсэн анхны тохиолдол бүртгэгдсэн талаар Их Британийн Эрүүл мэндийн салбарын аюулгүй байдлын агентлаг мэдээлжээ. 

Тодруулбал, амьсгалын замын өвчлөлтэй ижил шинж тэмдэгтэй өвчтөн эмчид хандсанаар тухайн хүнийг гахайн ханиадны вирусийн халдвар авсан гэдгийг тогтоосон байна. Одоо тухайн хүн бүрэн эдгэрсэн гэж агентлаг онцолжээ. 

Эрүүл мэндийн салбарын аюулгүй байдлын агентлагийн мэдэгдсэнээр, халдварын эх үүсвэрийг тодруулах ажлыг хийж байгаа бөгөөд халдвар авсан хүний гэр бүлийнхэн агентлагийн ажиглалтад байгаа, мөн хавьтагч болсон бүх хүн вирусийн шинжилгээ өгөх шаардлагатай гэнэ.

H1N2 нь хүнд ховорхон тусдаг гахайн ханиадны төрөл юм. 2005 оноос хойш энэ вирус хүнд туссан тохиолдол ердөө 50 удаа бүртгэгдэж байжээ. 

Г.Бямбасүрэн