Палестины ард түмний амьдрах, өөрсдийн тусгаар улс байгуулах эрхийг аль болох хурдан хэрэгжүүлэх ёстой гэж БНХАУ-ын дарга Ши Жинпинь мэдэгдсэнийг Синхуа агентлаг дамжуулжээ. 

Эх сурвалжийн мэдээлснээр, Палестины ард түмэнтэй эв санаа нэг байх олон улсын өдрийг тохиолдуулан гаргасан илтгэлдээ Ши Жинпинь Палестин, Израилын хооронд аль болох богино хугацаанд энхийн хэлэлцээрийг сэргээх ёстой гэж онцолсон байна. Мөн олон арван жилээр үргэлжилж буй Палестин, Израилын сөргөлдөөний гашуун сургамжаас харахад гагцхүү нийтийн аюулгүй байдлын концепци л тогтвортой аюулгүй байдалд хүрэхэд тусална гэдгийг харуулж байгааг цохон тэмдэглэжээ. 

Түүнчлэн БНХАУ-ын Гадаад хэргийн яам Палестин, Израилын сөргөлдөөнийг зохицуулах Хятадын байр суурь бүхий таван зүйл заалттай баримт бичгийг 11 дүгээр сарын 30-ны өдөр танилцуулсан байна. Энэ бичигт олон санал гаргасны дотор байлдааны ажиллагааг нэн даруй зогсоох, энгийн иргэдийг хамгаалах шаардлагатайг тусгажээ. Түүнчлэн "Хоёр ард түмний хоёр улс орон" төлөвлөгөөнд эргэн орж, Палестины тусгаар улсыг Дорнод Иерусалим нийслэлтэйгээр байгуулах нь зүйтэй гэж үзэж байгаа талаар онцолсон байна.

Г.Бямбасүрэн