Нүүрсний хулгайтай холбоотой нээлттэй сонсгол гурав дахь өдрөө үргэлжилж байна. Орон нутгийн Тавантолгой ХК-иас эхэлсэн сонсгол өнөөдөр төрийн өмчит Эрдэнэс Тавантолгой ХК-тай холбоотой найман асуудлаар шинжээчийн дүгнэлтийг сонсож байна.

Тавантолгойн орд газрын 90 гаруй хувийг эзэмшдэг Эрдэнэс Тавантолгой ХК-ийн оффисийн түрээсээс эхлээд тоног төхөөрөмж, хөрс хуулалт зэргийн худалдан авалтуудыг хэлэлцэж байна. Энэ сонсголд Эрдэнэс Тавантолгой ХК-ийг удирдаж байсан үе үеийн удирдлагууд ирж, өөрсдийгөө хамгаалах үгээ хэлэв. Харин 2008 оноос хойш Эрдэнэс Тавантолгой ХК-тай холбогдож, гүйцэтгэх захирал хүртэл нь ажилласан Б.Ганхуягийг оролцуулсангүй.

Нүүрсний хулгайг хянан шалгаж, сонсгол зохион байгуулах УИХ-ын Түр хорооны баталсан тогтоолд тусгасан гэрчүүдийн дунд түүний нэр бий. Тэр өнөөдөр сонсголд оролцож, Эрдэнэс Тавантолгой компанийн тендерүүдийн талаар гэрчийн мэдүүлэг өгөх ёстой ч ирүүлсэнгүй. Нэгэнт дуудахгүй болсон нь тодорхой болсон учраас Б.Ганхуяг өөрийн гараар хүсэлт бичиж, сонсголд оролцмоор байгаагаа илэрхийлжээ. Гэвч шүүхийн шийдвэрээр хоригдож байгаа яллагдагчид тийм боломж байхгүйг ХЗДХ-ийн сайд, Түр хорооны дарга Б.Энхбаяр тайлбарлалаа. Шүүхийн шийдвэрт хөндлөгөөс оролцож, нөлөөлөхийг хориглодог хуулийн заалттай учраас би юу ч хийж чадахгүй гэдгээ ХЗДХ-ийн сайд хэллээ.

Ард түмний бодлоор бол нүүрсний хулгайн сонсголд Б.Ганхуяг заавал оролцох учиртай. Эрдэнэс Тавантолгой ХК-ийн 2018 оноос хойших алдаа, оноо бүхэн энэ хүнтэй холбоотой. Нүүрс хулгайлсан уу эсвэл хулгайд алдсан уу, тендерүүдийг хууль бусаар шалгаруулсан уу эсвэл шахаанд орсон уу гээд түүнээс асуух олон асуулт хариултаа хүлээж байна. Магадгүй тэр өөрөө нүүрсний хулгайч эсвэл жинхэнэ хулгайчийг нэрлэх ганц хүн ч юм билүү.

Түүний гэрчийн мэдүүлэг олон хүнийг, хулгайн бүлэглэлийг өөртөө нь адил “аав”-ынд аваачих байсныг ч үгүйсгэх аргагүй. Тиймдээ ч хуулиар халхавчлан байж олон нийтийн өмнө үгээ хэлэх боломжийг нь зориудаар хаасан байж ч болох. Ямартай ч хэн нэгэн эсвэл хэсэг бүлэгт түүнээс айх шалтгаан байгаа бололтой.

Б.Ганхуяг үндэслэлгүй хөрөнгөжсөн, жагсаал зохион байгуулсан эсэх нь түүний хувь хүний асуудал. Харин Эрдэнэс Тавантолгой ХК-ийн нүүрсний хулгай бол түмний асуудал. Төрийн өмчит компани, ард түмний тэгш хүртэх ёстой байгалийн баялгаас олон жилийн турш хэн хумсалж, хулгайлж байсныг мэдэх эрх ард түмэнд бий. Үүний тулд Б.Ганхуягийн үгийг сонсох л учиртай.

Б.Хэрлэн