Турк улсын Истанбул хотын эрэгт 6.2 магнитудын хүчтэй газар хөдлөлт болсон. Газар хөдлөлтийн улмаас хүний амь нас эрсдээгүй ч хэт сандралд автсан Истанбул хотын иргэд гэр байшин, орон сууцнаасаа үсэрч гэмтэж бэртсэн баайна. Одоогоор байдлаар хэт сандралд авсан 151 хүн өндрөөс үсэрсэн гэж Истанбул хотын захиргаанаас мэдээлжээ. Мөн газар хөдлөлтийн улмаас барилга байгууламж эвдэрч сүйдээгүй байна. Истанбул хотод  газар хөдлөлтийн 51 удаагийн чичиргээ бүртгэгдсэн бөгөөд онцгой байдлын албанд сандарч тэвдсэн иргэдийн 6100 орчим дуудлага ирсэн гэжээ.

Турк улс газар хөдлөлтийн идэвхтэй бүсэд оршдог. Мөн тус улсын түүхэнд хэд хэдэн удаагийн томоохон газар хөдлөлт тэмдэглэгдсэн байдгаас 2023 оны 2-р сард Турк Сирийн хилийн орчимд 7.8 магнитудын хүчтэй газар хөдлөлт болж түүхэнд хар толбо үлдээсэн байдаг. 2023 оны газар хөдлөлтөөр Турк болон Сирийн 50 мянга гаруй хүн ами насаа алдсан юм. Мөн 1999 онд  Измит хотод 7.6 магнитудын хүчтэй газар хөдлөлт болж 17,000 гаруй хүн амиа алдаж 500,000 орчим хүнийг нүүлгэн шилжүүлсэн байдаг.

2023 оны газар хөдлөлтөөс үүдэн Туркийн иргэд орон сууцны барилгын чанарт санаа зовинож, өндөр орон сууцад амьдрах “айдастай” болсон гэж цахим орчинд сэтгэгдэлүүдээ хуваалцсаар байна.