Ням гарагт ОХУ-ын төрийн мэдлийн телевизээр “Орос, Кремль, Путин 25 жил” нэртэй баримтат кино гарчээ. Уг кинонд Орос-Украины дайны тухай асуудал хөндсөн ярилцагууд болоод Владимир Путины нууцлаг хувийн амьдралын зарим хэсгүүд, тэр дундаа засаглалынх нь он жилүүд багтжээ. Орос-Украины дайны талаар асуусан сэтгүүлчийн асуултад Владимир Путин “Барууныхан биднийг өдөөн хатгаж алдаа гаргахыг хүссэн. Берлины хана нурсны дараа НАТО өргөжиж, ОХУ-ын нөлөөллийн бүсэд халдан доромжилсон эргэлтийн үе нь энэ дайн байсан гэжээ”. Мөн Владимир Путин уг баримтат кинондоо “Цөмийн зэвсэг хэрэглэхгүйгээр дайныг төгсгөх хангалттай нөөц, хүч чадал ОХУ-д бий” хэмээн мэдэгджээ.  Удирдагчийн тухай баримтат кинонд, Борис Ельцин КГБ-ын хурандаа асан Владимир Путинд суудлаа хүлээлгэн өгч буйг харуулсан бөгөөд тэрээр Иосиф Сталинаас хойшхи хамгийн урт хугацаанд засгийн эрх барьж буй төрийн тэргүүн болсоныг өгүүлжээ. Олон нийтийн санал асуулгад 85-аас дээш хувийн санал авдаг түүнийг Оросын тэрс үзэлтнүүд  дарангуйлагч, авлига, хээл хахуульд тулгуурласан хувийн засаглалын хэврэг тогтолцоог бий болгосон  гэж үздэг.