Санкт Петербург хот дахь Wildberries компанийн агуулах Украины нисгэгчгүй онгоцны цохилтод өртсөний улмаас Оросын хамгийн том онлайн худалдааны компани гурав дахь удаагаа Украины халдлагад өртөөөд байна. 

Тус компанийн үүсгэн байгуулагч, Оросын хамгийн баян эмэгтэй болох Татьяна Ким үүнээс гадна эзлэгдсэн Крым дэх Wildberries компанийн байгууламжууд мөн шатсан тухай мэдээлжээ.

Тэрбээр компанийн ажилчдаас шархадсан хүн байхгүй гэсэн бол Ленинград мужийн захирагч Александр Дрозденко бүс нутагт нь гарсан халдлагын улмаас гурван хүн шархадсаныг Телеграм сувгаараа мэдээлсэн байна.

Эх сурвалжийн мэдээлснээр хотын төвөөс өмнө зүгт 15 км зайд оршдог Шушары дүүргийн Wildberries компанийн ложистикийн байгууламжаас нэг утаа нь гарч байжээ. Нөгөө утаа нь Санкт Петербургийн зүүн өмнөд хэсэгт оршдог Уткина үйлдвэрийн агуулахаас гарсан байна.

Компаниас гаргасан мэдэгдэлд Санкт Петербург хот болон Ленинград муж дахь ложистикийн хоёр байгууламжийн үйл ажиллагаа зогссоныг дурджээ.

Баасан гарагийн орой Украины ерөнхийлөгч Зеленский зэвсэгт хүчин нь Wildberries компанийн байгууламжууд, Киров мужийн аж үйлдвэрт довтолсныг хүлээн зөвшөөрч, тэдгээрийг Оросын армид пуужин, нисгэгчгүй онгоцны эд анги нийлүүлдэг байсныг тайлбарласан юм.

“Эзлэн түрэмгийлэгч армид нисгэгчгүй онгоцны эд анги, навигацын тоног төхөөрөмж, цэргийн хэрэгсэл нийлүүлдэг Оросын ложистикийн байгууламжуудын эсрэг ажиллагаа үргэлжилж байна” гэж тэр сошиал хуудсандаа бичжээ.