Туркийн Анаталя хотод зохиогдож буй “MEMORIAD 2012” буюу “Оюуны олимп”-д манай тамирчид амжилттай оролцож байна. Дөрвөн жилд нэг удаа зохиогддог тус тэмцээнд эх орноо төлөөлөн “Монголын Оюун ухааны академи”-ийн зургаан тамирчин оролцож буй. Тодруулбал, Х.Хатанбаатар, Т.Мажигсүрэн, С.Цогбадрах, С.Ажкол, Б.Ганбаяр, Б.Анар нар энэхүү тэмцээнд оролцож буй. Энэ удаагийн тэмцээнд 20 орны 89 тамирчин өрсөлдөж байгаа бол дэлхийд РЭЙТИНГ-ээрээ эхний 20-д ордог 13 хүн оролцож байгаа аж.
Өчигдөр эхэлсэн “Оюуны олимп”-ийн эхний төрөл буюу "Тооны Марафон"-ы тэмцээнд Ой тогтоолтын ОУ-н Их Мастер С.Акжол мөнгөн медалийн болзол хангажээ. Тэрбээр нэг цагт 2300 цифр цээжилж, 2300 оноо авахаас 1620 оноо авснаар энэхүү болзолыг хангасан аж. Энэхүү тэмцээний дүрэм нь нэг цагийн дотор аль болох олон цифр дарааллаар нь тогтоон буцаж алдаагүй санах. Нэг эгнээн дээр 40 цифр (40 оноо) байх бөгөөд буцаж санахдаа тухайн эгнээн дээр нэг цифр алдахад 20 оноо, хоёр цифр алдахад шууд 0 оноо буюу оноо авахгүй. Энэ төрөл хамгийн хэцүү нь бөгөөд буцаж санахтайгаа нийт гурван цаг үргэлжилдэг байна. Уг тэмцээний өдрийн тэмцээнд монголын дөрвөн тамирчин эхний 10-т багтсан гэнэ.
Тэд өнөөдөр "Нэр зүс, царай" цээжлэх төрлөөр өрсөлдсөн бөгөөд Х.Хатанбаатар VIII байр, С.Цогбадрах XVI байрт тус тус оржээ. Энэ төрөлд манайхан амжилттай оролцсон боловч уг тэмцээний программд монгол хэлээр бэлтгэгдсэн материал байгаагүй аж. Бусад орнууд өөрийн төрөлх хэлээр уг тэмцээнд өрсөлдсөн бол манай тамирчид англи хэл дээр нэр цээжилж буцааж бичихдээ зөвхөн ганц ганц үсэгнээс болж хангалттай оноо авч чадаагүй гэнэ. Энэ удаагийн “MEMORIAD 2012” энэ сарын 28-ны өдөр хүртэл үргэлжлэх бөгөөд эх орноо төлөөлөн оюун ухаанаараа өрсөлдөж байгаа Монголын тамирчиддаа амжилт хүсье.
П.Наран