a

Монгол Улсын Засгийн газрын тохируулагч агентлаг Онцгой байдлын ерөнхий газар, Төрийн орон сууцны корпорацийн хооронд 2015-2017 онд хамтран ажиллах санамж бичигт өнөөдөр ОБЕГ-ын дарга, онцгой байдлын хурандаа Т.Бадрал, Төрийн орон сууцны корпорацийн ерөнхий захирал А.Гантулга нар гарын үсэг зурлаа. Мөн санамж бичигт гарын үсэг зурах ажиллагаанд Монгол Улсын Шадар сайд У.Хүрэлсүх, Барилга, хот байгуулалтын сайд Д.Цогтбаатар нар оролцлоо.

a

Төрийн орон сууцны корпораци нь нийслэлийн Хан-Уул дүүрэг дэх Буянт-Ухаа I, Буят-Ухаа II хорооллоос 2015 онд нийт 60 айлын орон сууцыг Онцгой байдлын асуудал эрхэлсэн байгууллагын төрийн тусгай албан хаагчдад хуваарилах болсон байна. Мөн Дархан-Уул, Увс, Архангай аймаг, Хэнтий аймгийн Бор-өндөр, Сэлэнгэ аймгийн Мандал сум, Хэнтий, Орхон, Ховд,  Дорнод аймаг болон бусад сум орон нутагт ТОСК-ийн санхүүжилтээр баригдах орон сууцны  10-аас доошгүй хувийг тухайн орон нутгийн онцгой байдлын албан хаагчдад хуваарилах аж.

a

Санамж бичигт ОБЕГ нь орон сууцанд хамрагдсан албан хаагчдын орон сууцны  урьдчилгаа төлбөр болон орон сууцны бага хүүтэй зээлэнд хамруулж, үлдэгдэл төлбөрийг төлөх асуудлыг хариуцна. Мөн ОБЕГ-ын харъяа анги байгууллагын дэд бүтэц шийдвэрлэгдсэн эзэмшил газарт орон сууц барихад хөрөнгө оруулалт хийх чиглэлээр  хамтарч ажиллах, ТОСК-оос хэрэгжүүлж буй төсөл хөтөлбөрт дэмжлэг туслалцаа үзүүлж, ажилтнуудын бие бялдарыг хөгжүүлэх, гамшгаас урьдчилан сэргийлэхэд туслах ажлыг Онцгой байдлын ерөнхий газрын материаллаг баазад тулгуурлан зохион байгуулж хамтран ажиллахаар тусгажээ.

s

Ийнхүү Онцгой байдлын ерөнхий газар, Төрийн орон сууцны корпорацийн хооронд 2015-2017 онд хамтран ажиллахаар байгуулсан санамж бичгийн хүрээнд Онцгой байдлын албаны 300 гаруй албан хаагч орон сууцаар хангагдах юм байна.

a

П.Наран