МАХН-ынхан Ерөнхий нарийн бичгийн дарга Г.Шийлэгдамбыгаа огцруулах ажлыг эхлүүлжээ. Ерөнхий нарийн бичгийн даргыг огцруулах, томилох асуудлыг МАХН-ын бага чуулганаараа хэлэлцдэг дүрэмтэй гэнэ.
Түүнийг огцруулах болсон шалтгаан нь Таван толгой, Оюутолгой зэрэг онц чухал асуудлууд УИХ-аар хэлэлцэгдэж буй энэ үед тус намынхан “нам гүм” байгаа нь генсекийн хариуцлагагүй байдалтай холбоотой аж.
Тиймээс тус намын Бага чуулганы гишүүдийн гуравны нэгээс илүү буюу 86 гишүүний гарын үсэг бүхий албан шаардлагыг өнөөдөр нарийн бичгийн дарга Г.Бямбасүрэн, Гүйцэтгэх товчооны гишүүн Г.Доёд нарт гардуулан өгсөн байна.
Уг шаардлагад Бага чуулганыг яаралтай зарлан хуралдуулж, шинэ генсекээ томилох асуудлыг өргөн барьжээ. Харин намын аппарат, гүйцэтгэх товчооныхон уг шаардлагыг хүлээн авахгүй, хэрэгжүүлэх хүсэлгүй байгаагаа илэрхийлсэн гэнэ.
П.Наран
Уншиж байна |