Сирийн  “Хемеймим” агаарын баазад гэрээт цэргийн үүрэг гүйцэтгэж байсан, техникийн мэргэжилтэн энэ сарын 26-нд амиа хорлосон байдалтай олдсон тухай “www.dolboeb.livejournal.com” мэдээллээ. Энэхүү мэдээллийг ОХУ-ын Батлан хамгаалах яам баталсан байна. Цэргийн хувийн мэдээллийг нууцалж байгаа бөгөөд тэрээр гадны нөлөөгүй амиа алдсан хэмээн мэдээлжээ.

Цогцсыг өчигдөр орон нутгийн цагаар 17.00 цагт гэр бүлийнхэнд нь хүлээлгэн өгсөн байна. Амиа хорлосон цэргийг Вадим Костенко гэдэг бөгөөд 19 настай байжээ. Түүний амиа хорлосон шалтгааныг урьдчилсан байдлаар хайр, дурлалаас болсон хэмээн албаныхан тайлбарласан байна.

Хүүгийн аав “TASS” агентлагт “Би хүүгээ тэднээс илүү мэднэ. Би хүүгээ хангалттай сайн мэднэ. Хайр дурлал гэсэн үү. Итгэхэд бэрх л юм. Үнэхээр итгэхийг хүсэхгүй байна. Өнөөдөр би хүүгээ алдлаа, Орос орон дайчнаасаа хагацлаа” гэж хэлжээ. Гэрчүүдийн мэдээлснээр “Вадим Сири рүү явахаасаа хагас сарын өмнө хоёр жил үерхсэн найз охиноосоо салсан” гэв.

Вадим аав, ээж, 17 настай охин дүүгийнхээ хамтаар амьдардаг байжээ. Тэрээр багаасаа л цэргийн сургуульд явж, бэлтгэгдсэн байна.

Б.Дэлгэрцэцэг