Сонгуульд нэр дэвших эрхмүүд өндөлзөөд эхэллээ. Хэдийгээр намаасаа нэр дэвших квотоо аваагүй ч горилогчид хөл нь хөнгөрчихсөн аймаг, дүүрэг явж,  нүүр дүүрэн мишээлт тодруулсаар иргэдтэй уулзаж явна. Өнгөрсөн дөрвөн жилийн өмнө төрд төлөөллөөрөө сонгосноос хойш барааг нь хараагүй, телевизээр л хааяахан хальт үзэгддэг тойргийн гишүүд ч  үе үе харагдаж, дахин хүч үзэхээр бэлтгэлээ базааж байгаа сурагтай. Ямартай ч зарим тойрогт нэр дэвших эрхмүүд эхнээсээ тодорч байна.

УИХ-ын сонгуульд нэр дэвших төрийн албан хаагч шинэ оноос өмнө ажлаа хүлээлгэн өгдөг хуультай. Энэ дагуу Монголбанкны дэд ерөнхийлөгч Б.Жавхлан ажлаасаа чөлөөлөгдсөн. Тэрбээр төрөлх Сүхбаатар аймагтаа МАН-аас нэр дэвших сурагтай. Түүнийг нутагтаа нэр хүндтэй, залуу боловсон хүчин гэж МАН үзэж байгаа аж. Харин АН-аас тус аймгийн Засаг дарга Ж.Батсуурь нэр дэвших бололтой. Өнгөрсөн жилүүдэд Сүхбаатар аймгийг хөгжүүлж, бүтээн байгуулалт хийж чадсан хэмээн Ж.Батсуурийг үнэлдэг. Тиймээс ч түүнийг намдаа нэг суудал аваад ирнэ гэж АН тунчиг их найдвар тавьж байгаа гэсэн. Гэхдээ сонгуульд нэр дэвшсэн Засаг дарга нарт харшилтай байдаг туршлага бий. Ямар ч сайн сайхан бүтээн байгуулалт өрнүүлсэн сонгогчид нь Засаг даргаа дэмждэггүй нь гашуун боловч үнэн үг. Тус аймгаас УИХ-ын гишүүнээр сонгогдсон Зам, тээврийн сайд М.Зоригт энэ удаад тойргоо өөрчлөхөөр шийдэж, Дорнодын тал руу санаархаж байгаа ч намаасаа нэр дэвших квот авах эсэх нь эргэлзээтэй юм.

УИХ-ын даргын нутаг гэгдэх Өвөрхангай аймагт АН-аас Баялаг бүтээгчдийг дэмжих холбооны ерөнхийлөгч Ч.Даваабаяр, УИХ дахь  АН-ын ажлын албаны дарга С.Дэмчиг нар нэр дэвших нь бараг тодорхой болчихсон. Ч.Даваабаярыг УИХ-ын даргын хүн гэдэг бол С.Дэмчиг Монголын толгой баян хүн гэх Эрчим хүчний сайд Д.Зоригтын хүн гэдгээрээ олон нийтэд танигдсан. Харин МАН-аас энэ удаад УИХ-ын гишүүн Я.Содбаатар, Засаг дарга Г.Тогтохсүрэн нарыг нэр дэвшүүлэхээр шодоод байгаа сурагтай. Өмнөх сонгуулиар Өвөрхангайн тойргоос сонгогчдын олонхийн саналыг МАН-аас нэр дэвшигч С.Чинзориг, С.Төмөрхүү нар авч, ялалт байгуулсан хэдий ч  шүүхийн шийдвэрээр АН-ын Г.Батхүү, Д.Зоригт нар сонгогдсон. Энэ удаад гишүүн Г.Батхүү, Д.Зоригт нар намын жагсаалтад багтахаар санаархаж буй бололтой.

Нийслэлийн тухайд Чингэлтэй дүүрэгт МАН-аас ШӨХТГ-ын дарга асан Т.Аюурсайхан, Засаг дарга Д.Ганболд нар нэр дэвших гэнэ. Д.Ганболдыг өнгөрсөн хугацаанд дүүрэгтээ их ажил хийсэн гэж иргэд ам сайтай байгаа бол Т.Аюурсайханы хувьд дүүргийн хуралд төлөөлөгчөөр ажиллаж байсан. Д.Ганболд 72 дугаар сургууль, Т.Аюурсайхан 23 дугаар сурууль төгссөн, аль аль нь Чингэлтэй дүүргийн унаган иргэд юм билээ. Харин АН-аас тус тойрогт Хөдөлмөрийн сайд Г.Баярсайхан дахин нэр дэвших сурагтай. Тэрбээр тус тойргоос хоёронтоо сонгогдоод байгаа. Гурав дахин нэр дэвшин сонгогдвол “дархан аварга” гэдэг шиг л юм болох нь. Мөн ХХАА-н сайд Г.Бурмаа нэр дэвших сурагтай. Тэрбээр өмнөх 2008 оны УИХ-ын сонгуулиар тус тойрогт нэр дэвшээд ялалт байгуулж чадаагүй. Энэ удаад шантрахгүйгээр дахин нэр дэвших гэнэ.

Цаашлаад Эрдэнэтэд АН-аас УИХ-ын гишүүн М.Батчимэг, МАН-аас УИХ-ын гишүүн О.Содбилэг, Сонгинохайрхан дүүрэгт АН-аас УИХ-ын гишүүн Л.Эрдэнэчимэг дахин хүч үзэж, Баянгол дүүрэгт МАН-аас экс Засаг дарга Л.Амгалан, Сүхбаатар дүүрэгт нийслэлийн Засаг даргын орлогч асан Ц.Цогзолмаа гэх мэтээр нэр дэвшихээр горилцгоож байгаа аж.

Сонгуулийн хуваарийн дагуу намууд нэр дэвшигчдээ тодруулах мөч ойртож л байна. Тэр хүртэл улс төрийн намуудад хэр их найр, хор, нанчилдаан өрнөхийг таашгүй.

Н.Энхбат