Мексикийн Веракруз мужид байрлах нефтийн үйлдвэрт өчигдөр 15.30 цагийн орчимд гэнэт дэлбэрэлт болсон талаар “CNN” агентлаг мэдээллээ. Дэлбэрэлтээр 30 ажилтан гэмтэж, эмнэлэгт хүргэгджээ.

Төрийн өмчийн “Пемекс” компанийн нефтийн үйлдвэрт гарсан галыг унтраахын тулд 500 гаруй гал сөнөөгч ажиллаж байна. Дэлбэрэлтийн улмаас агаар ихээр бохирдсон тул хотын иргэдийг яаралтай нүүлгэн шилжүүлж, бүх сургууль цэцэрлэг болон үйлчилгээний байгууллагуудыг хаажээ. Галын шалтгаан одоогоор тодорхойгүй байна.

2010 оноос эхлэн тус компанийн эзэмшлийн газрууд дарааллан дэлбэрэх болжээ. 2012 оны есдүгээр сарын 16-нд Тамалуипс мужнаа байрлах тус үйлдвэрийн хийн үйлдвэр дэлбэрч, 33 хүн амиа алджээ. Харин 2013 оны нэгдүгээр сард нийслэл Мехико хотноо байрлах тус компанийн удирдлагын байранд хий дэлбэрч, 37 хүн амиа алджээ. Уг дэлбэрэлтийн үеэр компанийн нууцад хамааралтай бичиг баримтууд алга болсон аж.

Б.Дэлгэрцэцэг