Нийслэлийн АН-ын дарга Э.Бат-Үүл, нийслэлийн сонгуулийн штабын дарга Д.Баттулга нар мэдээлэл хийлээ. Тэд энэ удаа газрын асуудлаар ирж буй өрсөлдөгчдийн дайралт болоод тэрнээс болгоомжлохыг нэр дэвшигчид болоод дэмжигчдэдээ анхааруулав.
Нийслэлийн АН-ын дарга Э.Бат-Үүл:
“Манай баг, миний бие рүү газрын авлига, наймаагаар хөлжсөн, нийслэлийг удирдаж байсан бүлэглэлээс маш их гүтгэлэг, дайралт эрчимжиж байгааг сонгогч олондоо хэлье. Хамгийн гол нь ард олны дунд газрын мафи гэж нэрлэгдэх болсон бүлэг этгээдүүдийн зүгээс өөрсдийн алдагдсан эрх мэдэлээ олж авахын тулд сонгуулийг, энэ боломжийг ашиглах гэж улайрч байна. Тиймээс газрын мафи гэх бүлэглэлээс бол нийслэл хэрхэн хохирсон тухай материалыг дэлгэе.
Дэлхийн банк Улаанбаатар хотын газрыг дэлхийн жишгээр үнэлж, орлого олсон бол ямар хэмжээний хөрөнгө төвлөрүүлэх байсныг судалжээ. Уг тайланд 2012 он хүртэл газрыг дуудлагаар худалдсан бол 26.9 их наяд төгрөгийн орлогыг нийслэлийн төсөвт төвлөрүүлэх байсныг дурдсан байна. Хэрвээ энэ мөнгө төсөвт орлого болж орсон бол 26 000 сургууль, цэцэрлэгийн цогцолбор барих байжээ. Бүхэл бүтэн шинэ хотыг барих хэмжээний орлого төсөвт орж ирээгүй байна. Энэ мөнгө 52 жилийн төсвийн орлого гэсэн үг. Энэ хаашаа орсон нь ойлгомжтой.
Энэ хэмжээний баялгийг хяналтандаа байлгаж байсан бүлэг, газрын наймаачид өнөөдөр сонгуулийн боломжийг алдахыг хүсэхгүй байна. Үүний төлөө улайран тэмцэж байна. Бид ийм асуудал үүсэх эрсдэлийг тооцож байсан. Газрын мафичид бол асар их мөнгөтэй, нийгэм, эдийн засгийн баялгийг хяналтандаа авсан хүмүүс. Тэд гүтгэх, гүжирдэх бүх аргыг хэрэглэж байна. Сонгуулийг газрын төлөөх тулалдаан болгож байна” гэв.
Мөн тэрбээр өнгөрсөн хугацаанд хууль бусаар олгосон 200 гаруй газрын зөвшөөрлийг хүчингүй болгосно дуулгав. Гэвч асуудал шүүх дээр унаад байсан учраас газар эзэмшигчтэй тохиролцож, дуудлагаар худалдсан байна. Ингэхэд газрын дуудлага худалдааны анхны үнээс 68 тэрбум 493 сая төгрөг орж ирснийг хэлэв. Энэ их баялгийг эргэж хяналтандаа авч, өөрсдийнхөө мэдэлд оруулахаар улайрч байна. Засаг захиргааг мөнгөний төлөө хамжлага болгож байсан бүлэлтэй тэмцэхэд хэцүү байна. Хууль ёс байг гэхэд хүний ёсзүй алдагдахад хүрч байгааг НИТХ-д нэр дэвшиж буй өөрийн багийн 45 нэр дэвшигч болон тэдний дэмжигч нарт анхаарууллаа.
В.Бат