Өчигдөр эмэгтэйчүүдийн 69 кг-ийн жинд хүч үзсэн Монголын тамирчин Мөнхжанцангийн Анхцэцэг огцом өргөлтөөр 106, түлхэлттэй өргөлтөөр 131 өргөж нийлбэр 237 оноотойгоор наймдугаар байрт бичигдлээ.

“...Намайг энэ спортод анх хөл тавьж байхад аав, ээж хоёр маань тун дурамжхан ханддаг байлаа. “Эмэгтэй хүн байж хар төмөр өргөөд” гэх яриа орой бүр гарна. Гэвч би энэ спортод хайртай” хэмээж суусансан. Сүүлд  “Рио 2016” олимпийн наадамд Монгол улсаа төлөөлөн оролцох тамирчдыг үдэн гаргах ёслолын үеэр ярилцахыг хүсэхэд “Багш загнаад байдаг юм аа. Ярилцлага өгч болохгүй” гэж шивнэчихээд хүүхдийнх гэмээр цайлган инээмсэглээд “Хичээнэ ээ” л гэсэн.

Өнөө, даанч тэр ялагдал хүлээж, тэмцээнээ өндөрлүүллээ. Арваннайман настай түүнд анхны олимп нь ахдаа юм болов уу даа. Туршлага, сэтгэлзүйн бэлтгэл ч дутсан байж болох. Гэхдээ тэр чансаатай тамирчин гэдгээ харуулж, тив дэлхийд эх орныхоо нэрийг хэдэнтээ дуурсгасан тамирчин.

Тэрбээр өнгөрсөн оны арваннэгдүгээр сард АНУ-ын Техас мужийн Хьюстон хотноо хүндийн өргөлтийн насанд хүрэгчдийн Дэлхийн Аварга Шалгаруулах тэмцээн оролцож, IV байрт шалгарч байсан билээ. Тус тэмцээнээс хүрэл медаль хүртсэн Грекийн тамирчин А.Ефтикиа сэргээшийн шинжилгээнд бүдэрч, медалиа хураалгасан.  Улмаар манай тамирчин М.Анхцэцэгийн байр урагшилж  Дэлхийн аварга шалгаруулах тэмцээний хүрэл медальтан болж байв.Тэрбээр ийнхүү дэлхийн аваргын медаль хүртсэн анхны Монгол тамирчин болж, түүхэн амжилтын эзэн болсон юм.

Мөн өнгөрсөн дөрөвдүгээр сард Узбекистанд болсон хүндийг өргөлтийн Ази тивийн аварга шалгаруулах тэмцээний эмэгтэйчүүдийн 75 кг-ын жинд огцом өргөлтөөр 112 кг, түлхэлттэй өргөлтөөр 132 кг, нийлбэрээр 244 кг өргөж Ази тивийн аваргын алтан медалийг зүүж Ташкентийн тэнгэрт Монголын төрийн дууллыг эгшиглүүлсэн билээ.

Өнгөрсөн зургадугаар сард Дэлхийн өсвөрийн аваргын тэмцээнд огцом өргөлтөөр 115 кг, түлхэлттэй өргөлтөөр 138 кг өргөж, нийлбэр дүнгээр 253 кг-ийн амжилттай хоёрдугаар байрт орж байсан юм.

Тиймээс ч идэрхэн тамирчинд ахиад зөндөөн олимп бий.

Тэрбээр хоёр жилийн өмнө өгсөн ярилцлагадаа “Би олимпийн аварга болох зорилготой, зургаан жил төмөр өргөж байна. Үүнийхээ үр шимийг амсахыг өдөр бүр хүсдэг, мөрөөддөг, залбирдаг” хэмээж байсан. Харамсам юм. Мөрөөдөл нь биелсэнгүй.

Гэвч Монголын хүндийг өргөлтийн залгамж халаа болж, амжилтаа ахиулсаар буй залуу тамирчинд алдах эрх бий.  Нас, бяр нэмэх хугацаа ч хэрэгтэй. Ахиад дөрвөн жилийн дараа олимп болно оо М.Анхцэцэгээ.

Г.Тэгшсүрэн