АТГ-ын Мөрдөн байцаах хэлтсийн алба хаагчид БОАЖЯ-ны  Хүрээлэн буй орчин, байгалийн нөөцийн удирдлагын газрын дарга Д.Даваасамба гэх эрхмийг авлигын хэргээр үйлдэл дээр нь баривчиллаа гэх мэдээлэл цацагдсан. 

УИХ-ын нэр бүхий гишүүд ч эл мэдээллийг батлан сошиал сүлжээндээ байр сууриа илэрхийлээд амжсан юм. 

Тэгвэл албаны эх сурвалжийн мэдээллээр Хүрээлэн буй орчин, байгалийн нөөцийн удирдлагын газрын дарга Д.Даваасамбаас  гадна мэргэжилтэн С.Баярхүү, Үнэлгээ, аудитын хэлтсийн дарга П.Бүнчинжав нарын дөрвөн хүнийг АТГ-аас баривчилжээ. Тэднийг хуш модны самар хилээр давуулах зөвшөөрөл өгч, улмаар хувьдаа их хэмжээний авлига авсан хэрэгт хуулийнхан буруутгаж буй аж. 

 

 

Өнгөрсөн жил байгаль үр шимээ харамгүй хайрлаж, хуш модны самар их хэмжээгээр урган олон ч хүний ахуй амьдралд нэмэр тусаа өгсөн. Иргэд ч түүж, түүнийгээ хувь хүмүүс, аж ахуй нэгжүүдэд худалдан борлуулсан нь бий. Харин эдүгээ хушны самар хэдхэн компанид их хэмжээгээр нөөцлөгдөн гагцхүү хилээр гаргах зөвшөөрөл өгөхийг л хүлээж буй аж. Үүнтэй холбоотойгоор Эрүүгийн цагдаагийн газар, Мөрдөн байцаах газрын байгалийн эсрэг гэмт хэрэгтэй тэмцэх хэлтэс хамтран  хууль бусаар хуш модны самар хилээр гаргах гэж байгаа компаниудад шалгалт хийх явцдаа  “Оюут цагаан барс” гэх компанийн захирал Ц.Анхбаяр 600 тонн хуш модны самар гаргах зөвшөөрөл авахын тулд Хүрээлэн буй орчин, байгалийн нөөцийн удирдлагын газрын нэр бүхий албан тушаалтнуудад хахууль өгснийг тогтоожээ. 

 

Ингээд Хүрээлэн буй орчин, байгалийн нөөцийн удирдлагын газрын дарга Д.Даваасамбагаас гадна байгалийн нөөцийн удирдлагын газрын мэргэжилтэн С.Баярхүү, Үнэлгээ, аудитын хэлтсийн дарга П.Бүнчинжав нарын гурван хүнийг  авлига авсан  хэрэгт шалгаж эхэлсэн байна. 

 

Одоогоор байгалийн нөөцийн удирдлагын газрын мэргэжилтэн С.Баярхүүд 40 сая төгрөгний хахууль өгсөн нь тогтоогдож, харин Хүрээлэн буй орчин, байгалийн нөөцийн удирдлагын газрын дарга Д.Даваасамбыг 150 сая төгрөгний авлига авсан хэргээр шалгаж буй юм байна.