Хотын дарга асан Э.Бат-Үүл мэдээлэл хийж, сэтгүүлчдийн асуултад хариуллаа. 

-Та намын гишүүдтэй хандан бойкот хийх уриалга гаргасан. Харин танай намаас зургаан ч хүн нэр дэвших хүсэлтээ илэрхийллээ. Үүнийг та хэрхэн харж байгаа вэ?

-Манай намд, нэр дэвшигчдэд болчих байлгүй гэсэн горьдлого байна. Горьдлогодоо хөтлөгдөөд байна. өмнө нь бид хууртсан. Горьдлогодоо хөтлөгдсөнөөс болж маш том алдаа гаргасан. 2016 оны сонгуулийн дүн биднийг цочирдуулсан.

-Та намын даргадаа бойкот хийх тухайгаа хэлсэн гэлээ. С.Эрдэнэ дарга ямар хариу өгсөн вэ?

-Энэ талаар бодож үзье, эргэж хариу өгье гэсэн.

-Нэр дэвшигчийг тодруулах танай намын асуулга эхэлсэн. Та хэн нэгнийг дэмжих үү?

-Би хэнийг ч дэмжихгүй.

-Та Ерөнхийлөгчийн сонгуульд санал өгөхгүй юу?

-Би оролцохгүй. Би гэр хороолол руугаа явна.

- Танай хүүгийн Грандлайн компанитай холбоотой асуудал өнөө ч яригдсаар байгаа?

-Грандлайнтай холбоотойгоор миний хүүг Чулуудайг эцэс төгсгөлгүй гүжирдэж байна. Би гүжир гүтгэлэг ёслолын буудлага болж байгааг одоо харж байна. Чулуудай ямар ч тендерт оролцоогүй. Тухайн үед дахин төлөвлөлт хийх компаниудаас иргэдтэй хамгийн өндөр үнэ цэнээр тохирсон. Аавынхаа ажилд дэмжлэг болох гэсэн үйл ажиллагаа.  Худал үгийг мянга давтахаар үнэн болдог. Чулуудай оффшор дансанд ямар ч гүйлгээ хийгээгүй гэдгээ хэлээд байхад гүтгэсээр байгаад одоо оффшорчин болгосон.  Тэнд ямар ч тендер явагддаггүй гэж хэлээд байхад тендерчин болчихсон. Үнэн худлыг тогтоож өгөөч гэж хуулийн байгууллагад хандаад ч авдаггүй.

В.Бат